Къе, 30-июлдиз, Кьурагь райондин администрациядин заседанийрин залда райондин кьилин заместитель Махач Хариева нубатдин совещание кьиле тухвана. И гьакъиндай «Лезги газетдиз» муниципалитетдин администрациядин пресс-къуллугъди хабар гузва. 

Хуьруьн майишатдин ва чилерихъ галаз алакъалу отделдин пешекар Нариман Мисриева къейд авурвал, райондин дуьзенлух зонадин майишатра цанвай бегьерар – магьсулар кlватl хъувунва. Дагълух чкайра лагьайтlа, бегьер кlватl хъувунин кар давам жезва.

Образованидин отделдин начальник Рамазан Катибова мектебра ремонтдин к1валахар кьиле физвай гьалдикай ихтилатна. Малум хьайивал, и райондин Гелхен хуьруьн мектебдиз и йикъара РД-дин образованидин министрдин заместитель мугьман хьана. И мектеб эцигунин к1валах 1-сентябрдиз акьалт1арун лазим я. Министрдин заместителди къейднавайвал, мектеб эцигунин гьалдикай РД-дин Кьилин везифаяр вахтуналди тамамарзавай В.Васильева вичел гьар гьафтеда малуматар агакьарунин буйругъ ганва.

Райондин важиблу месэлаяр веревирд авур совещанидал ЦРБ-дин кьилин духтур Омар Гьададов, финансрин отделдин начальник Бахтияр Ибрагьимов ва маса жавабдар къуллугъчияр рахана.

 «Лезги газет»