22-декабрдиз Махачкъалада, «Газпром трансгаз Махачкъала» ООО-дин майдандал кархана арадал гъайи ва адан сад лагьай регьбер хьайи Насрутдин Насрутдинован 90-йисан юбилейдин мярекат кьиле фена.
Республикада газдин хилен бине кутур ва тIебии газ дагъустанвийрин яшайишдин къакъудиз тежер паюниз элкъуьрай кас тир Н.Насрутдиноваз хайи югъ мубаракиз, карханадин ва санлай газдин хилен пешекарар, ветеранар, адахъ галаз санал региондин газотранспортдин хел виликди тухуз куьмек гайи амадагар, жемиятдин векилар кIватI хьана. Мярекат юбилярдин зегьметдин рекьиз бахшнавай «Гаф ва кар» фильм къалурунилай башламишна.
Тебрикдин гафар лугьудайла, «Газпром трансгаз Махачкъала» ООО-дин гендиректор Александр Астанина къейд авурвал, къенин юкъуз компания Россиядин Кьиблепатан газдин хилен виридалайни чIехи карханайрикай сад я. Ада неинки Дагъустандин ва Кеферпатан Кавказдин, гьакIни Закавказьедин муьштерияр газдалди таъминарзава.
«Куьне «Газпром трансгаз Махачкъала» активнидаказ виликди фин патал мягькем бине кутуна. Куьне газ республикадин виридалайни яргъал тир пипIерив агакьарун патал вири къуватар желбна. Икьван еке ва четин кIвалах кьилиз акъудун анжах къастунал кIеви касдилай алакьда», — къейдна ада.
РД-дин энергетикадин министр Марат Шихалиева Н.Насрутдиноваз рикIин сидкьидай чухсагъул лагьана. Ада къейд авурвал, карханади вичин сад лагьай регьберди башламишай баркаллу кIвалах къенин юкъузни лайихлудаказ кьиле тухузва.
Мярекатдал «Газпром» ПАО-дин правленидин председателдин заместитель Сергей Хомякован ва «Газпром профсоюз» ПАО МПО-дин председатель Владимир Ковальчукан патайни тебрикдин телер кIелна.
Вичин нубатдай Н.Насрутдинова, жегьилрихъ элкъвена, лагьана: «Дяведин йисарин аялар яз, чун кесибдаказ яшамиш жезвай. Амма гьамиша, гьатта аялар язни, чна жуван Ватандикай фикирдай. Заз лугьуз кIанзава хьи, куьне гьамиша инсанрин, халкьдин дуланажагъ патал кIвалахун ва уьлкведа гьалар хъсан хьун патал зегьмет чIугуникай фикирун лазим я». Мярекат вирида санал шикил ягъуналди акьалтIарна.
Амина Муслимова
