ЦIийи йисан вилик Чечнядин Шали шегьерда итимрин арада спортдин ва женгинин самбодай СКФО-дин чемпионат кьиле фена. 2024-йисан мартдиз Брянск шегьерда кьиле фидай Россиядин чемпионатда иштиракдай мумкинвал къазанмишун патал ана уьлкведин саки вири регионрай тир 300-далай виниз спортсменри чпин устадвал къалурна. Абурун арада чи ватанэгьлиярни авай. ИкI, вичин ери-бине Ахцегь райондин Къутунхъарин хуьряй тир, алай вахтунда Каспийскда яшамиш жезвай Завир Гьажиева 58 кг-дин заланвал авайбурун арада женгинин самбодай — къизилдин ва спортдин самбодай буьруьнждин медалар къазанмишна.
РикIел хкин, 20 йиса авай З.Гьажиевахъ спортдин рекье агалкьунар идалай вилик йисарани хьана. Ам самбодай спортдин мастер, Дагъустандин, СКФО-дин чемпионвилин тIварарин сагьиб я.
СКФО-дин акъажунра Мегьарамдхуьряй тир, тренер Садир Айвазован гъилик вичин устадвал хкажзавай Самур Камиловани (88 кг-дин заланвал авайбурун арада) женгинин самбодай къизилдин медаль къазанмишна.
Гила чи ватанэгьлийри Россиядин чемпионатдиз гьазурвилер аквада.
Рагнеда Рамалданова
