И мукьвара Махачкъалада армрестлингдай жаванрин арада Дагъустандин кIвенкIвечивал патал кьиле фейи акъажунра республикадин жуьреба-жуьре районрайни шегьеррай атанвай 300-лай виниз спортсменри иштиракна. Чпин алакьунар вини дережада аваз къалурайбурун арада СтIал Сулейманан райондин спортдин, туризмдин ва жегьилрин крарин рекьяй комитетди рекье тунвай командани авай. ИкI, тренерар тир Малик Тагьирбегован ва Рамидин Къазимегьамедован гъилик вердишвилер къачузвай жаван спортсменри къизилдин — 3, гимишдин – 1 ва буьруьнждин 3 медаль къазанмишна.
Республикадин чемпионатда гъилерин къуватар ва устадвал вини дережада аваз къалурайбурун арада Ахцегь райондин Гъуьгъвезрин хуьруьн жаван спортсменарни ава. ИкI, Шакир Муслимов (65 кг) ва Спартак Нурмегьамедов (70 кг) – къизилдин, Риза Муслимов (60 кг) — гимишдин, Шагьбала Шагьэмиров (90 кг-дилай гзаф заланвал авайбурун арада) ва Фаргьад Сардаров (45 кг) буьруьнждин медалриз лайихлу хьана.
Са муштулух мадни: вичин ери-бине Мегьарамдхуьруьн райондин Гъепцегьрилай тир, Ахцегьрин 2-нумрадин ДЮСШ-дин тренер Эльдар Алискендаров Дагъустандин 2023-йисан виридалайни хъсан тренер яз гьисабна. Тренервилин кIвалахда къазанмишнавай агалкьунрай, сагълам уьмуьр кьиле тухун пропаганда авунай ва армрестлинг вилик тухунай адаз Дагъустан Республикадин армрестлингдин федерациядин президент А.Булатован къул алай грамота гана.
РикIел хкин, Э.Алискендаров 22 йисал къведалди яшара авайбурун арада армспортдай дуьньядин 4 сеферда чемпион, «Кавказдин къугъунар» фестивалдин кьве сеферда гъалибчи, пешекаррин арада дуьньядин Кубокдин сагьиб я. 2014-йисуз ам Россиядин виридалайни хъсан тренер яз гьисабнай.
Рагнеда Рамалданова
