Орел шегьердикай делилар
. Орел Россиядин машгьур шегьер, областдин центр я. Адан умуми майдан 121,2 квадратный километрдикай ибарат я.
. Шегьерда 296 агъзурни 600-далай гзаф инсанар яшамиш жезва.
. Орелдинни Москвадин арада 324 километрдин мензил ава, Махачкъаладинни Орелдин арада – 1815 километрдин мензил.
. Шегьер Ока вацIун ва Орлик хилен къерехрив гва. Шегьердал акьалтнавай тIварни и вацIарихъ галаз алакъалу я.
. Чешмейри къейдзавайвал, къаравулвал авунин пункт яз, Орелдин бине 1566-йисуз Иван Грозныйди кутуна.
. 17-асирдин сифте кьилера и шегьер халкь Б.Годунован ва В.Шуйскийдин гьукуматдиз акси къарагъай центрадиз элкъвена.
. 1615-йисуз Польшадин мидявалзавай кьушунри Орелдин къеле барбатIна. 1636-йисуз и къеле гуьнгуьна хтуна ва ам 1702-йисалди амазмай.
. I Петрдин девирда Орел военный къеле яз амукьнач.
. 1778-йисуз II Екатеринади Орелдин губерния тешкилзава.
. И шегьерда сифте театр 1815-йисуз ачухна. Ракьун рехъ 1868-йисуз тухвана.
. Орелдин гзаф памятникар ва топонимар Ватандин ЧIехи дяведин вакъиайрихъ галаз алакъалу я. И дяведилай кьулухъ Орелдин 167 агьали СССР-дин Игит лагьай тIварцIиз лайихлу хьана.
. Дяведилай кьулухъ Орелдин областдин мулкарин бязи паяр мад сеферда арадал хкай Брянскдин, Калугадин, Липецкдин областрив вахкана.
. Алай вахтунда Орел индустриядин, аграриядин рекьяй Россиядин чIехи макан яз гьисабзава. Ина жуьреба-жуьре машинар, приборар арадал гъидай карханаяр, заводар кардик ква, кьезил промышленность еримлу хьанва.
. 2007-йисуз Орел шегьердиз «Женгинин баркаллувилин шегьер» тIвар гана.
. Орел туристрин фикир желбдай къулайвилер, винел патан ажайиб акунар авай чка я.
«Лезги газет»
