12-15-декабрдиз Санкт-Петербургда Бразилиядин джиу-джитсудай дуьньядин ачух чемпионат кьиле фена. Ана са жерге уьлквейрай атанвай 5000-далай виниз спортсменри иштиракна. Абурун жергедай тир чи ватанэгьли, Дагъустандин Муфтиятдин СтIал Сулейманан райондин просвещенидин отделдин регьбер Шамиль Рагьманова (85 кг) и чемпионатда мичIи яру рангунин чIулар авайбурун арада 1-чка кьуна.
Нубатдин гъалибвал къазанмишун патал чи ватанэгьлиди, джиу-джитсудин хъсан техника ва йигинвал, гьакIни спортдин и жуьредал машгъул жезвай спортсмендиз хас тир виридалайни хъсан ерияр къалуруналди, 3 бягьсни итижлудаказ ва инанмишвилелди кьиле тухвана.
РикIел хкин, вичин ери-бине Азербайжандин КцIар райондин Кириг хуьряй тир Ш.Рагьманова алатай йисан эхирра Санкт-Петербургда Бразилиядин джиу-джитсудай кьиле фейи дуьньядин чемпионатдани, 6 бягьс кьиле тухуналди, 85 кг-дин заланвал ва вили рангунин чIулар авайбурун арада къизилдин медаль — дуьньядин чемпионвилин тIвар — къазанмишна. Идалайни гъейри, гьа и чемпионатда ада абсолютный категориядани 3-чка кьуна. 2021-йисуз лагьайтIа, Сад Хьанвай Арабрин Эмиратрин меркез Абу-Даби шегьерда спортдин и жуьредай кьиле фейи дуьньядин чемпионатда чи ватанэгьли буьруьнждин медалдиз лайихлу хьанай.
Шамиль Рагьманова Дербентда тренер Мурад Нурудинован гъилик вичин устадвал хкажзава. Чи мурад адахъ ва чи амай ватанэгьлийрихъни гележегда мадни чIехи агалкьунар хьун я.
Рагнеда Рамалданова
