Алатай гьафтеда Махачкъалада, Урусрин М.Горькийдин тIварунихъ галай драмтеатрдин гъвечIи залда, Дагъларин уьлкведин халкьдин яратмишунар ва адетдин культура хуьник ва вилик тухуник лайихлу пай кутунай гузвай «Дагъустандин руьгь» («Душа Дагестана») РД-дин госпремия вахкуниз талукьарнавай шад мярекат ва чIехи концерт кьиле фена. Идакай чаз мярекатдин тешкилатчийрикай сад тир РДНТ-дин (Республикадин халкьдин яратмишунрин кIвал) пресс-къуллугъди хабар гана. Театрдин фойеда цIинин ва алатай йисарин и премиядин лауреатрин декоративно-прикладной искусстводин выставкани ачухнавай.
РикIел хкин, «Дагъустандин руьгь» премия 2012-йисалай инихъ конкурсдин бинедаллаз 8 номинациядай («Халкьдин кьуьл», «Халкьдин мани», «Халкьдин музыка», «Халкьдин адетдин культура», «Халкьдин устад», «Халкьдин театр», «Халкьдин музыкадин алат», «Жаван бажарагъ») гузва. Ада халкьдин искусстводин хъсан адетар хуьнин ва акьалтзавай несилрив агакьарунин важиблувал къалурзава. Алатнавай йисара и премиядиз 157 кас лайихлу хьана. И юкъуз лагьайтIа, 15 касдив премияр вахкана.
Шад мярекат Дагъустандин культурадин министр Зарема Бутаевади ачухна.
— «Дагъустандин руьгь» премия — им неинки чи халкьарин культурадин зурба ирс ва кьетIен милли адетар хуьник чпин лайихлу пай кутазвай ксарин зегьмет къейддай, абур руьгьламишдай, гьакIни абурув чими келимаяр агакьардай мумкинвални я. Абуру вирида къенин юкъуз Дагъустан гьам чи республикадин, гьамни Россиядин ва международный дережадин жуьреба-жуьре майданра лайихлудаказ къалурзава, — къейдна министрди.
Дугъриданни, Дагъустандин халкьарин яратмишунардай коллективри кIватI хьанвайбуруз яргъалди рикIел аламукьдай легьзеяр багъишна. Кьилди къачуртIа, ана Кьурагь, Мегьарамдхуьруьн, Гергебил, Ботлих, Тарумовка, Табасаран, Казбек, Къули районрай ва Буйнакск, Махачкъала, Дагъустандин Огни, Избербаш шегьеррай тир яратмишунрин коллективри ва кьилди манияр тамамардайбуру, кьуьлердайбуру иштиракна. Абурун гьар са нумра тамашачийри яргъалди капар ягъуналди къаршиламишзавай.
Шадвилелди мадни а кардикай хабар гуз кIанзава хьи, «Дагъустандин руьгь» премиядиз лайихлу хьайибурун арада чи халкьдин векиларни ава. Кьилди къачуртIа, «Халкьдин музыка» номинацияда — ашукь, РДНТ-дин отделдин пешекар Алихан Мегьамедрагьимовакай (Докъузпара район), «Халкьдин устад» номинацияда — Испикрин хъенчIин къапарин устад Набиюллагь Керимхановакай (СтIал Сулейманан район), «Халкьдин театр» номинацияда – Кьурагь райондин «Культурадин, досугдин ва туризмдин центр» МБУ-дин халкьдин театрдин актриса Кевсер Фейзуллаевадикай ва Мегьарамдхуьруьн райондин халкьдин «Чирагъ» театрдин режиссёр Жавид Гьуьсейновакай «Дагъустандин руьгь» премиядин лауреатар хьана.
Чна абуруз нубатдин агалкьун ва алукьзавай ЦIийи йис рикIин сидкьидай тебрикзава, абурухъ чандин мягькем сагъвал ва хизанра хушбахтлувал хьун алхишзава.
Рагнеда Рамалданова
