Дагъустан Республикадин «100 мектеб» проектдин сергьятра аваз Сулейман-Стальский районда карчийри ва маса ватанэгьлийри чпин хайи мектебар ремонт хъувунин ва я цlийибур эцигунин к1валахриз пулдин куьмекар гузва.

Икl, Сулейман-Стальский райондин администрациядин пресс-къуллугъди хабар гузвайвал, Кlахцугърин юкьван мектебдин дараматни цlийи хъийида. Проектдин асул макьсад республикадин умуми образованидин тешкилатрин гьалар материалдин жигьетдай хъсанарун я.

Такьатар республикадин бюджетдай 2 миллион манатдин кьадарда аваз чара ийида, гьак1ни са кьадар муниципалитетдин патайни куьмек жеда. Идалай гъейри, проектдин к1валахрик къуьн кутун патал карчиярни, яни чпихъ такьат авай ватанэгьлиярни желбда.

Кlахцугърин мектеб 1934-йисуз эцигнава. Проектдин сергьятра аваз мектеб ц1ийи хъувунин кардик карчи, вичин ери-бине  Юкьван Стlалдилай тир Марат Алиярова вичин пайни кутада. М.Алияров РД-дин Халкьдин Собранидин депутат я. Инвесторди хайи мектеб ремонт авуниз вичин патай 400 агъзур манат пул чара ийида.

Райондин Кьил Нариман Абдулмуталибова Марат Алияроваз чухсагъул малумарнавай чар ракъурнава.

Къейд ийин, алай вахтунда т1вар кьунвай хуьруьн мектебда 84 аялди к1елзава, 24 муаллимди кlвалахзава.

«Лезги газет»