Дуьз лугьузва: ким хуьруьн абур я. Гьар са магьледихъ вичин ким ава. Ата-бубайрилай инихъ камаллу агъсакъалри месэлаяр гьялдай марифатлу чка -ким авачирди хуьр хьиз аквадач. Хуьруьн хийир-шийирдин вири хабарарни гьанал ван къведа. Адет яз, виликрай экуьнахъ фад итимар кимел кIватI жедай. Са кас рагьметдиз фейилани, магьледин итимар, кьиле гьуьрметлу фекьини (дуьа ийидай агъсакъал) аваз, дуьадал фидай. Им, гьелбетда, абурлу кар я.
Эхиримжи вахтара икI магьле-магьле, къифле-къифле дуьадал финин адет, гьайиф хьи, зайиф жезва. Мисал яз, виликдай Ахцегьрин Пельтуьйрин магьледин кьиле рагьметлу Мирзе-буба Гьабибуллаев (ам мискIиндин имам тир) авай. Дуьадал текъведай итимриз ада кимел айибар гъидай. Гьавиляй дуьадал итим текъведай кIвал саки авачир. Мирзе-буба рагьметдиз фейидалай гуьгъуьниз и кар хушуналди Урдухан Жалилова, ахпа Керем Керимова, рагьметлу Юсуф Мамедова ва масабуру чпин хивез къачунай. Гила гьанани кимин ва дуьадин кьил кьадай кас амач. Кимин кьил кьадайбур Ахцегьрин са жерге маса магьлейрани амач. Нетижада кимерал ичкибазарни къалиянчияр кIватI жезва, дуьайрал инсанар кьилди-кьилди физва. Хъсан дуьшуьшда гьар магьлейрай къвезвайбур дестейриз кIватI жезва. Бубайрин хъсан адетар хвена, несилрив агакьарна кIанда.
Мад са татугай гьалдикай лугьун. Виликрай кимел ацукьзавайбуру анаг михьидаказ хуьз чалишмишвалдай. Гила лагьайтIа, бязибуру анал семечкаяр незва, пIапIрусар чIугвазва, гьатта ички хъвазва, ким чиркинарзава. Пакамахъ и чкадин михьивал хъийидай касни жезвач. Ихьтин кимер участковый полицейскийрин гуьзчивилик хьанайтIа, пис жедачир.
Умудзава хьи, инлай кьулухъ Пельтуьйрин ва гьакI маса куьгьне магьлейрин кимер инсанри мергьяматлувилин къанунралди гуьнгуьниз хкида ва Ахцегьрин цIийи магьлейрани чпин кимер ва абурун кьил кьадай гьуьрметлу агъсакъалар майдандиз акъатда.
Рагьидин Эминов
