26-июлдиз РД-дин Кьилин везифаяр вахтуналди тамамарзавай Владимир Васильева Махачкъаладин Дуствилин кlвале гьукуматдин наградаяр вахкунин шад мярекат кьиле тухвана. И гьакъиндай «Лезги газетдиз» РД-дин Кьилин ва Гьукуматдин Администрациядин пресс-къуллугъди хабар гузва.

РД-дин Конституциядин юкъуз кьиле фейи мярекатда, адет тирвал, къайда-къанун ва республикадин халкьарин арада дуствал мягькемарунин, гзаф миллетрикай ибарат тир Дагъустандин экономика вилик тухунин, ватанэгьлийрин яшайиш хъсанарунин кардик метлеблу пай кутур ксарин лайихлувилер къейдзава.

Наградаяр гайибуру сиягьдин кьиле Зейнудин Лукьманович Батманован тIвар авай. Адаз пуд йис алатайдалай кьулухъ РФ-дин Президентдин къарардалди Россиядин Игитдин тlвар (вич кечмиш хьайила) гана.

«Бажарагълу, викlегь инсанар, халисан игитар, жуван Ватандин ватанпересар тербияламишуналди Дагъустан тафаватлу жезва. Россияда и гьакъиндай чизва ва Дагъустандиз гьуьрметни ийизва… Зейнудин Лукьмановичан хендеда Жамиля Халидовнадив ва хва Къадир Зейнудиновичав РФ-дин Игитдин гъед вахкун зун патал чlехи гьуьрметдин кар я», — лагьана В.Васильева.

Гъед вахкайдалай кьулухъ Жамиля Халидовнади Россиядин Президент В.Путиназ ва РД-дин Кьилин везифаяр вахтуналди тамамарзавай В.Васильеваз чlехи награда гунай сагърай лагьана.

Къейд ийин, шад мярекатдин сергьятра аваз и юкъуз В.Васильева 43 касдив наградаяр вахкана.

«Лезги газет»