12-декабрдин нянихъ чав пашман, туькьуьл хабар агакьна: залан азардикди агъамакьави инженер-механик, Россиядин журналистрин ва писателрин союзрин член, Дагъустандин культурадин лайихлу къуллугъчи, къад йисалай виниз «Лезги газетдин» редакцияда гъакъисагъвилелди зегьмет чIугур чи амадаг ва дуст Шагьабудин Нурдинович Шабатов рагьметдиз фена.
Шагьабудин Шабатов виликдай Кьурагь райондик акатзавай Агъа Макьарин хуьре 1951-йисан 4-февралдиз зегьметчи хизанда дидедиз хьана. ЦIийи Макьарин юкьван школа куьтягьай ада 1969-1971-йисара Советрин Армиядин жергейра къуллугъна. 1972-йисуз жегьил АрхитIрин хуьряй тир Ханум тIвар алай рушал эвленмиш хьана.
«Зардиянский» совхозда зегьмет чIугваз, Шабатова 1974-1981-йисара Ростовдин областда (Зерноград шегьерда) АЧИМСХ (Азово-Черноморский институт механизации сельского хозяйства) вузда кIелна, инженер-механиквилин диплом къачуна. Совхозда кIвалахай йисара адакай механизатор, механик, бригадир, эцигунрин отделдин начальник, майишатдин хатасузвилин рекьяй инженер, кьилин инженер хьана. Майишатдин крар вилик тухун патал ада вичелай алакьдай гзаф крарик кьил кутуна.
Гьеле школада амаз яратмишунин тах квай, газетриз макъалаяр, шиирар кхьизвай инженердиз 1994-йисуз «Лезги газетдин» редакцияда кIвалах теклифна. И жавабдар везифа ада 2015-йисалди лайихлувилелди, редакциядин коллектив ва кIелзавайбур рази жедайвал кьилиз акъудна.
Яратмишзавайбурун идарада Шабатован илгьамдин булах мадни ачух хьана. Къад йисан муддатда адан къелемдикай шииратдин ва гьикаятдин «Къуьлуьн кьилер», «Ша хъуьрен», «Илиф Макьаз», «Эй дуьнья», «Аллагьди гайиди», «Лезги мехъерар», «Чи адетар», «Девирдин лишанар», «Дуьньядиз це экуьвал», «Жувакай», «Жуван веревирдер», «Эминан зиярат», «Вагъуф буба», «Кьвед лагьай кас», «Салман вуж тир?», «Зунни Сайдумов», «Веси ва Аллагьдивай тIалабун», «Зи фикирар», «Эхиримжи сиягьат», гьакIни авторрин уртах «Куьредин ярар», «Кьурагь райондин 70 йис», «Арифдарринни алимрин ватан», урус чIалалди акъуднавай уртах ва кьилдин «Дети аула», «Песня сердца моего» ктабрин автор тир. ИкI, ада милли эдебият вилик финик вичин жанлу пай кутуна.
Ш.Шабатова Ватандикай, уьмуьрдикай, яшайишдикай, муьгьуьббатдикай, тIебиатдикай, аялрикай, девирдин татугайвилерикай кхьизвай. Адан эсерар урус, табасаран, дарги чIалариз элкъуьрнава. Чи кIеви дуст, кьуд хцин, 8 хтулдин, 3 птулдин буба, уьмуьрдин юлдаш Хануман далу, багърийрин панагь. Гьажибег Гьажибегован тIварунихъ галай премиядин лауреат, «За любовь и верность», «Сталинан 130 йис», «РФ-дин профсоюзрин 100 йис», «Перепись лап хъсандаказ кьиле тухунай» медалрин сагьиб тир. Адан фикирдик кхьидай затIар, тамамардай къени крар гзаф квай. Вучда кьван, рагьмет хьурай вичиз. Хизанриз сагъвал гурай!
Жемятдин арада гьуьрмет къазанмишай къени инсан, шад зарафатчи, вафалу дуст, бажарагълу шаир ам чидайбурун рикIерай садрани акъатдач. Адан руьгь чахъ галаз яшамиш жеда.
«Лезги газетдин» редакциядин коллектив
