Райондин гьаларикай рахана

Дербент райондин рекьерин гьал хъсанарунин серенжемар кьиле тухун патал алай йисуз саки 73 миллион манат чара авунвай. «Дагъустан» РИА-ди хабар гузвайвал, идакай ЦУР-да кьиле тухвай ачух эфирда муниципалитетдин кьил Мавсум Рагьимова раижна.

Къейдзавайвал, рекьер туьхкIуьрунин кIвалахар «Зи Дагъустан – зи рекьер» ва «Дагъустандин муниципалитетра авай ре­кьер — 2022-2024-йисариз» тIвар алай программайрин сергьятра аваз кьиле тухванва. ИкI, 11 участокда, санлай къачурла, саки 7,3 километрдилай виниз мензилда рекьер гуьнгуьна хтунва. Им, алатай йисан кIвалахрив гекъигайла, 40 процентдин гзаф я (2022-йисуз и рекъем 4,24 километрдиз барабар тир).

Райондин кьилин гафаралди, эхиримжи пуд йисан къене агьалияр яшамиш жезвай 29 чкада (поселенида), санлай къачурла, 23,2 километрдин мензилдин рекьер капитальнидаказ туьхкIуьрнава. Чара авунвай пулдин такьатар тамамдиз харжнава ва чпикай ихтилат физвай программаярни кьилиз акъуднава.

Чиновник гьакIни Дербент районда электроэнергиядиз талукь месэлаяр авай гьалдикайни рахана. Адан гафаралди, эхиримжи пуд йисуз ина 36 трансформатор эцигнава ва 16 километрдин мензилдиз цIийи линияр тухвана. Гьа са вахтунда 19 трансформатор цIийи кьилелай туькIуьр хъувунва. «Ибур вири чна хсуси къуватралди ва такьатралди ийизвайди я», -лагьана ада.

И жигьетдай районда гьалар хъсан патахъ дегишарун патал 50 цIийи трансформатор эцигунин ва 30 километрдин мензилдиз цIийи линияр тухунин игьтияж ава. Рагьимова къейд авурвал, ибур ада игьтият фикирда кьуна лагьанвай рекъемар я, гьикI хьи, агьалийрин кьадар гзаф жезва, и делилдихъ галаз санал электросетрин майишатрал акьалтзавай парни артух жезва.

Маса къачудай ният ава

Дагъустанди 2024-йисуз хуьруьн майишатдин техника маса  къачун патал ийизвай харжияр 18,8 процентдин артухарун пландик кутунва. Идакай «РБК Кавказ» изданиди хабар гузва.

ИкI, эгер 2023-йисуз и макьсадриз 673 миллион манат харжнавайтIа, 2024-йисуз а такьатрин кьадар 800 миллион манатдал кьван артухардай ният ава.

Изданидин делилралди, республикада 2023-йисан 10 вацран къене техника къачунин кьадар тIимиларнач, гьатта къиметар хкаж хьанватIани. Къейдзавайвал, и муддатда хуьруьн майишатдин метягьар арадал гъизвайбуру 331 уьлчме техника маса къачуна.

Саудиядин Аравиядиз

И йикъара Дагъустандин экспортдиз куьмек гудай Центради Саудиядин Ара­виядай атанвай делегациядиз республи­када алишверишдин хиле кIвалах кьиле тухун теклифна. И серенжемдин сергьят­ра аваз мугьманрин ватандиз республикадай экспорт ийиз жедай метягьар яз алай девирдин теплицаяр, михьи вирт ва маса суьрсет  теклифна, — хабар гузва «Дагъус­тан» РИА-ди.

Чешмеди кхьизвайвал, Саудиядин Аравиядинни Урусатдин арада алишверишдин жигьетдай кьиле физвай гьерекатар эхиримжи йисуз 40 процентдин артух хьанва. И делилди кьве уьлкведин арада и хиляй кIвалах вилик фин патал еке мумкинвилер авайди къалурзава.

Сад тир билет

Махачкъаладин аэропортуна «сад тир билетдин» къурулуш кардик акатнава. Ахтармишун патал кьиле тухузвай цIийи и серенжемдин сергьятра аваз гила агьалийривай гьа са билетдихъ гьам самолетдаваз, гьамни «Махачкъала – Аэропорт» маршрутдин автобусдаваз физ жеда. Идакай ТАСС-ди хабар гузва.

Къейдзавайвал, ихьтин серенжем кардик кутунин гьакъиндай РД-дин транспортдин ва рекьерин майишатдин минис­терстводинни «Сад тир улакьрин дирекция» АНО-дин (АНО «Единая транспортная ­дирекция») арада махсус икьрар ку­тIуннава.

РикIел хкин, виликдай чна хабар гайи­вал, алай йисан апрелдилай гатIунна, Ма­хачкъаладай чкадин аэропортуниз цIийи маршрут кардик кутунва. Ам лап вини­ ­дережадин къулайвилералдини ха­тасуз­ви­лел­ди таъминарнава. Автобусди­н ракIа­рихъ, набут инсанрин игьтияжар фи­кир­да кьуна, абур хкаж жедай махсус тадарак­ни гал­кIурнава. Са улакьда 22 кас гьакьзава.

Гьазурайди — Муса  Агьмедов