Донбасс миллетбазрикай хуьн патал Украинадин мулкара РФ-ди кьиле тухузвай дяведин махсус серенжемда лезги чилин гьар са пипIяй, гьам дагълух, гьамни дуьзенлух хуьрерай викIегь ватанэгьлийри гьунарлувилелди иштиракзава. Армиядин жергейра вичин викIегьвилер икьван чIавалдини къалурнавай чIехи прапорщик Магьир Межлумович Рамазановни СВО-да иштиракзавай дагъви я.
Ам Ахцегь райондин Фиярин хуьре 1983-йисан 5-сентябрдиз дидедиз хьана. 2002-йисуз адаз армиядин жергейриз эвер гана. 2003-йисуз прапорщикрин мектеб куьтягьай ада Хабаровск шегьерда къуллугъ давамар хъувуна.
2006-йисуз Магьир Рамазанов Абхазиядин мулкара авай РФ-дин Яракьлу Къуватрин дяведин 7 лагьай базадиз рекье туна. ЦIерид йисни зур я ада армиядин жергейра къуллугъ кьилиз акъудиз.
Ада Гуржистандинни Абхазиядин арада кьиле фейи къалмакъалра иштиракна. Ина къалурай викIегьвилерай М.Рамазановаз Абхазиядин медаль гана. Аскервилин, женгерин гьерекатрин рекьяй тежриба авай дагъви хкягъай рекьиз гьамиша вафалу я.
— СВО-да за гьа сифте йикъарилай иштиракзава. Чун Чернобаевкадин (Херсондин тереф) мулкариз акъатна. Херсондин областда зун яргъалди хьана, ина зал залан херни хьана. Къеняй беден, нервияр гужлуз къарсурай хер сагъар хъувун патал зун гзаф вахтунда госпиталра къаткана, — ихтилатна фийиви аскерди.
Магьираз Жукован медаль ганва. Суворован медаль гунин гьакъиндайни къарар акъуднава (гьелелиг и шабагь аскердив ахгакьнавач).
Частунин командир, подполковник А.Горякина Магьира кIелай мектебдиз, диде-бубайриз, Ахцегь райондин кьиле авайбуруз разивилин чарар рахкурна. Вичин вилик эцигнавай везифаяр намуслудаказ кьилиз акъудзавай аскер, дяведин махсус серенжемдин иштиракчи Магьир Рамазанов хьтин хциз лайихлу тербия, чирвилер гунай диде-бубадиз, мектебдин муаллимриз сагърай лугьуналди, аскерди ватанпересвилин ялавлу чешне къалурзавайдини къейднава.
«Акьалтай четинвилеризни килиг тавуна, Куьне тереф хуьникди Магьир Рамазанов гьукуматдин, хизандин, багърийрин умудлу даях яз амукьзава. Ада вичин вири къуватар Россиядин милли итижар хуьниз серфзава. Куь хцел чи уьлкведивай гьахълудаказ дамах ийиз жеда», — кхьенва Магьиран диде Сагьибе Умметовнадин тIварцIел командирди рахкурнавай разивилинни алхишрин чарче.
К. Ферзалиев
