Дагъустандин зравоохраненидин сайтда хабар ганвайвал, алатай киш юкъуз Махачкъалада, Дагмедуниверситетдин дараматда, РД-дин Гьукуматдин Председатель Артём Здунован регьбервилик кваз, республикадин здравоохранение вилик тухунин месэлайриз талукьарна, стратегиядин метлеб авай сессия кьиле тухвана. Мярекатдин иштиракчийри «2035-йисалди Дагъустан Республикадин яшайишни экономика вилик тухунин стратегия» проектдин сергьятра аваз региондин здравоохранение вилик тухунин месэлаяр веревирдна.
Мярекат ачухдай вахтунда Артём Здунова къейд авурвал, алай вахтунда Дагъустандин кьиле авай ксари республика вилик тухунин гьар са хиле кьилди-кьилди кIвалахзава, расалмиш хьанвай четин месэлайриз килигзава. И жуьредин гуьруьшарни абур гьикI арадай акъуддатIа, гьадаз талукьбур я.
Вичин рахунра премьер-министрди, кьилинбурун ва екез фикир гун истемишзавай месэлайрин жергедай яз, агъадихъ галайбур къалурна: здравоохраненидин инфраструктура вилик тухун, дарманралди таъминарун хъсанарун, агьалийриз ийизвай медицинадин къуллугърин еридин дережа хкажун, медицинадин кадрияр гьазурунин къурулуш, кьилдин ксарин инвестицияр желб авунин ва государстводинни кьилдин ксарин амадагвилин алакъаяр хуьн.
Здравоохраненидин къурулуш лап тамамвилихъ агакьарунин важиблувиликай рахадайла, А.Здунова и хел вилик тухун патал пулдин такьатрин кьадар артухардайдакай лагьана, гьа гьисабдай яз регионди федеральный жуьреба-жуьре программайра иштирак авуналдини. Гьа са вахтунда ада тамам тушир къурулушдиз пулдин такьатар чара авуни гьамиша хийир гунал гъин тийидайдини къейдна.
Елена Ельниковади лагьана хьи, РД-дин Халкьдин Собранидин здравоохраненидин Комитетди гьамиша фикир гузвай месэлайрин жергеда и хиле тIал алайбурукай тир хуьруьн чкайра медицинадин сифтегьан куьмек агакьаруниз, юкьван медперсоналдин мажибдиз талукьбур ва масабур ава.
РД-дин Кьилин ва Гьукуматдин Администрациядин регьбер Владимир Иванова мярекатдал идарадин кадрияр жагъурун патал «Зи Дагъустан» тIвар алаз мукьвара малумарнавай конкурсдикай, адан макьсаддикай галай-галайвал суьгьбетна ва и конкурсда активнидаказ иштиракуниз эвер гана.
Республикадин здравоохраненидин хиле кадрийрин кьитвал авайдакай лугьуналди, Артём Здунова къейдна: «Чаз пешекарар тир кьилин духтурар, идарадин персонал, ОМС-дин хиляй, гьа гьисабдай яз аялриз медицинадин рекьяй къуллугъдай пешекарарни герек я».
Сессиядал кьилин доклад авур РД-дин здравоохраненидин министр Жамалудин Гьажиибрагьимов кIвалахда кар алай месэлайрикай рахана. Абурун жергеда республикадин дагълух районриз, гъил акакьдай куьмек гун таъминарун, аялар кьинин дуьшуьшар тIимиларун, кьетIен кьезилвилер авай агьалияр дарманралди таъминарунин кIвалах хъсанарун, информационный технологияр ва медицинадин илимдин вилик квай агалкьунар здравоохраненидин практикада ишлемишун (ва икI мад) ава.
Ж.Гьажиибрагьимов 2018-йисуз министерстводин вилик акъвазнавай кьилин месэлайрикайни галай-галайвал рахана. ЦIи Дагъустандин аялрин поликлиникаяр вилик тухун патал РФ-дин минздравдин тайин макьсаддихъ элкъуьрнавай программадин сергьятра аваз федеральный бюджетдай саки 300 миллиондив агакьна субсидияр чара авуникайни хабар гана. Министрди мадни алава хъувурвал, 900 агъзур аял авай Дагъустанда аялрин типовой гьич са поликлиникани авач. Еке учирар арадал атун, медицинадин лап важиблу тир параклинический подразделенияр ачухиз тахьун и месэла гьял тавунихъ галаз алакъалу я.
— Аялрин поликлиникаяр кьабулун лазим тир кьадардилай пуд сеферда артух аялриз къуллугъ авуниз мажбур хьанва. Идани медицинадин къуллугърин еридиз ва абур агакьарунин тегьердиз кьецI тагана тазвач. Махачкъалада пудалай тIимил тушиз аялрин поликлиникяр эцигунин лазимвал ава, — къейдна Жамалудин Гьажиибрагьимова.
Гуьгъуьнлай медицинадин жуьреба-жуьре хилерай элкъвей столар тешкилна. Абурун сергьятра аваз важиблу месэлаяр ва абур гьялдай рекьер-хуьлер веревирдна.
Чи мухбир
