Вахтар къвез алатда, гъиле еке къуллугъар гьатай гзафбурун Аллагь рикIелай фида. Сулейман-Стальский райондин Герейханован совхоз тIвар-ван авай хъсан майишатрикай сад тир. Хуьр лагьайтIа, шегьердиз ухшар хьанвай. Кьиле рагьметлу Мигьряли Бачханов хьтин ватандихъ, халкьдихъ рикI кудай камаллу коммунистар хьайила агьалийрин дуланажагъни хъсан тир.
Са шумуд райондин хуьрерай атана, ина чпиз кIвал-югъ кутунвай агьалийрин арада гьуьрмет, хатурни авай. А вахтунда эцигай культурадин кIвал, больницаяр, школа, кьве мертебадин кьакьан кIвалер ва икI мад хуьруьн дамах тир…
Бубайри лугьудайвал, туьтуьник твар акатайла, бязи чиновникрин рикIелай вич хайи къулни алатда. Вич инсан тирди инсандин рикIелай алатун, халкьдин зегьметдалди арадал гъайи девлет вичин хсуси нефсиниз ишлемишун гьахъсуз кар тирди вучиз ятIани кваз кьадач. Уьлкведа кьиле фейи дегишвилерикай менфят хкудна, хуьре авай общественный дараматарни маса гун са жуьрединни кутугай кIвалах туш. Культурадин кIвалин вилик квай В.И. Ленинан гуьмбет авай паркни маса гана. Гила ам элядай хьтинди я. Хуьруьн администрациядин дарамат, контора, совхоз амачирла, маса гана, са пипIе кирида кьунвай кIвале хуьруьн совет амукьна. Эхирни а дарамат маса къачунвай касдиз, анаг чукIурна, са вуч ятIани эцигиз кIанзава. Хуьруьн поселенидин кьил, культурадин кIвалин са пипI ремонтна, гьаниз акъудна.
Са шумуд йисуз, совхоздин регьбер яз, и дараматда кIвалахай коммунист, хъсан карчи Исмаил Къадировичан рикIиз, и аламачир конторадин виликай фидайла, гьикьван туькьуьл жезватIа! Ихьтин инсанрин адалатлу кIвалахар чIур хьун гьайиф къведай кар я.
Гьуьрметлу газет кIелзавай чи лезги рухваяр ва рушар, чна жуван хсуси нефс патал ихьтин дараматар чукIур тийин. Квез шикилдай аквазвайди, кьве мертебадин дарамат чукIурна, аламай къванерин хараяр я. Сад-вад йикъалай абурни амукьдач, баябан жеда. Агьалияр, и дарамат къачуна, чукIурнавайдалай ваъ, ам маса ганвайбурулай нарази я. Яраб, гележегда хъсанвилихъ дегишвилер жедатIа?..
Вадим Жамалдинов
