Чи гележег тир акьалтзавай не­силдиз чирвилерни марифатлу тербия гунин, аялар ватанпересвилин руьгьдаллаз тербияламишунин месэла четинди, гзаф терефринди, гьа са вахтунда жавабдардини я. И везифа агалкьунралди кьилиз акъудун муаллимдин устадвилелай, ам вичин везифайрив эгечIзавай тегьердилай гзаф аслу жезва.

Девирдин дарвилериз килиг тавуна,  гьар са тарс яратмишдай тегьерда тухузвай, и кар патал вири мумкинвилерикай менфят къачузвай муаллимар Мегьарамдхуьруьн райондин школайра тIимил авач. Абур девирди арадал гъанвай четинвилер алудиз, акьалтзавай несил дерин кьатIунар аваз ва лигим яз уьмуьрдин рекьел акъудиз алахъзава. Муаллимдин пак тIвар хуьзвайбур, гузвай гъвечIи ма­жиб­ризни килиг тавуна, чпин кIва­лах рехне квачиз тамамариз алахъзава. Ихьтинбурукай сад Советский хуьруьн юкьван школадин завуч,­ математик Гьажимурадов Фейзуллагь муаллим я. Ам ялцугъви­ рагьметлу Эседуллагьанни Гьани­фадин кесиб хизанда 1953-йисан­ 8-декабрдиз дидедиз хьана. Рагьметлу Эседуллагь къванцин кIва­лер, чимивал гудай вижевай  пичер эцигдай устIар тир. Чи ва къунши хуьрерин агьалийрин арада адаз еке гьуьрмет авай. Ада вичин аяларни зегьметдал рикI алаз, чIехи-гъвечIиди чидайбур яз тербияламишна. Адан камаллу суьгьбетар, хкетар исятдани сивера ама.

1971-йисуз Фейзуллагьа хуьруьн юкьван школа лап хъсан къиметар аваз куьтягьна ва гьа йисуз­ адакай ДГУ-дин математикадин фа­культетдин студент хьана. Шегьердани Фейзуллагьа вичин низам хвена. Вири четинвилериз таб гана, диде-бубадин кьил агъуз­ тийи­дайвал, гъвечIи стхайриз чешне же­дайвал кIелна. Вузда ада общест­венный кIвалахрани иштиракна, коллективда гьуьрмет къазанмишна, диде-бубадин рикI шадарна.

1976-йисуз Ф.Гьажимурадова ДГУ акьалтIарна ва вичин хайи хуьруьн школада математикадин муаллимвиле кIвалахиз башламишна. Сифте йикъарилай ада ви­чиз тарс гайи тежрибалу муаллимрилай чешне къачуз хьана. Вичин пеше гзаф кIандай Фейзуллагьалай математика аялризни кIанариз алакьна.

Фейзуллагь муаллимди вич хъсан чирвилер авай пешекар, их­тибарнавай карда вичин къуват­рин гьайиф текъведай инсан тирди лап сифте йикъалай субутарна. Ада  аялар тербияламишуниз, абурук ватан кIан хьунин гьиссер кутуниз акьалтIай фикир гузвай. Вич жегьил муаллим яз, акьалтзавай несилдин вилик жавабдарвал аннамишай Ф.Гьажимурадов неинки кIелзавайбурун, педколлективдин, гьакI диде-бубайрин арадани  бажарагълу, кар алакьдай муаллим, хъсан инсан яз машгьур хьана.

Школадин коллективди адал са шумуд йисуз профкомдин председателдин везифаярни ихтибарна. Профкомдин председатель хьайи вири девирда ада коллективдин итижар хвена.

1989-йисуз Ф.Гьажимурадов, школадин коллективди сесер гуналди, завучвиле хкяна. Адан михьивилел, дуьзвилел, гафунал кIе­вивилел, мягькемвилел, нукьсанрикай ачухдаказ  лугьунал вирида разивал ийизва. Ингье, 34 йис я Фейзуллагь муаллимди школадин завучвиле кIвалахиз. Адан кIва­лах­дин тежриба райондин школайрани сейли хьанва.

Кьилин категориядин завуч­ ва­ муаллим, райондин аттеста­ций­­­­рин  экспертрин ва меда­лист­рин­ ко­мис­сийрин член Ф.Гьа­жиму­­­радо­ваз гьа­­к­ъисагъвилелди кIва­­­­ла­­хунай школадин админист­ра­цияди, райондин образованидин­ уп­равлени­ди са шумуд сеферда гра­мотаяр­­ гана ва 2002-йисуз­ ам «РД-дин халкьдин прос­вещенидин отличник» лагьай тIвар­цIиз лайих­лу хьана. Яргъал йи­сара чIугур баркаллу зегьметдай­, пешекарвилин чIехи дережадай­ ва кIвалахдив яратмишунривди­ эгечIунай Ф.Гьа­жимурадоваз 2008-йисуз «РФ-дин умуми образо­ванидин гьуьрметлу работник», 2009-йисуз «Зегьметдин ветеран» тIварар гана.

Ф.Гьажимурадов, чешнелу муаллим хьиз, хъсан манидарни я. Ам школадин муаллимрикай тешкилнавай фольклордин «Ялцугъ» ансамблдин активный иштиракчини я. Ада хъуьтуьл, назик, рикIи кужумдай ширин  сесиналди тамамарзавай манияр тамашачийри хушдиз кьабулзава.

Ф.Гьажимурадов 47 йисуз шко­лада кIвалахнавай тежрибалу муаллим хьиз, гьакI туькIвей хизандин кьил, хтулрин кIани буба ва хатурлу къуншини я. Адан уьмуьрдин юлдаш, кьилин образование авай Азима сифтегьан классрин муаллим я. Абурун хизанда кьве аял чIехи хьанва. Хва Арсенани руш Радмилади ДГПУ акьалтIарнава. Радмила вичин хизандихъ галаз Владикавказ шегьерда яшамиш жезва. Арсенан свас Раидади,  Дербентдин педколледжда кIелна,  школада­ кIва­лахзава. И хизандиз чавай муаллимрин хизан лугьуз жеда.

Инсандин уьмуьрда лишанлу йикъарин арада виридалайни важиблубурукай сад дидедиз хайи югъ я. Уьмуьрдин вири терефар инсанвилин лишанри гуьрчегарна­вай Фейзуллагь Эседуллаевича и мукьвара,  8-декабрдиз вичин 70 йисан юбилей къейддайвал я. Аллагьди квез и хъуьтIуьн вацра гатфарин гуьлуьшан йикъар багъишрай. Къуй  квехъ мягькем сагъвал, хуьруьнвийрин балайриз чирвилерни  тербия гунин карда гележегдани агалкьунар, хизандани гьамиша шад манидин сес хьурай, гьуьрметлу Фейзуллагь муаллим!

Ферид  Вагьабов, 

РД-дин лайихлу муаллим