25-ноябрдиз Дербентда, Дагъустандин Кьил Сергей Меликован иштираквал аваз мукьвара ачухай физкультурадинни сагъламвал мягькемардай комплексдин цIийи дараматда, путарин спортдай Дагъустандин чемпионат ва кIвенкIвечивал патал акъажунар кьиле фена. Абурун тешкилатчияр РД-дин физический культурадинни спортдин министерство ва Дагъустандин путарин спортдин Федерация тир. Акъажунрин спонсоррин жергеда Лезгийрин милли медениятдин федеральный автономия (ФЛНКА) ва Белижда кардик квай «Медиа маркет» туьквен авай. ФЛНКА-ди спортдин серенжемдин сергьятра аваз «Дагъустандин виридалайни викIегь пагьливан» махсус конкурсни тешкилнавай.
Акъажунра чи республикадин жуьреба-жуьре пипIерай 100-далай виниз спортсменри иштиракна. Абур ачухуниз талукьарнавай шад мярекатдал спортсменрихъ элкъвена чими келимаяр лагьайбурун арада РД-дин путарин спортдин Федерациядин президент Магелан Саидов, ФЛНКА-дин векил Садикь Гьасанов, СтIал Сулейманан райондин спортдин, туризмдин ва жегьилрин крарин рекьяй комитетдин директор Чингиз Абдулмежидов ва масабур авай.
Къизгъиндаказ ва хъсан тешкиллувал аваз кьиле фейи чемпионатда командайрин арада Дербент райондин Белиж посёлокдин спортшколадин команда 1-чкадиз лайихлу хьана. Мегьарамдхуьруьн ва Кьурагь районрин командайри 2, 3-чкаяр кьуна.
Заланвилиз килигна, Дагъустандин чемпионвилин тIварариз дишегьлийрикай — Тайбат Агъамова (63 кг) ва Венера Мирзабалаева (63 кг-дилай гзаф заланвиляй), итимрикай — Шагьабудин Аличубанов (63 кг), Самрат Мирзоев (68 кг), Рустам Агъабегов (73 кг), Азим Абакаров (78 кг), Ренат Оружбегов (85 кг), Эдик Агьмедов (95 кг) ва Рустамзал Мегьамедмирзоев (95 кг-дилай гзаф заланвиляй) лайихлу хьана.
Дагъустандин кIвенкIвечивал патал акъажунра СтIал Сулейманан райондин команда 1-чкадиз лайихлу хьана. Дербент райондин — 2 ва Каспийскдин «Парус» спортшколадин командайри 3-чкаяр кьуна.
ФЛНКА-ди тешкилнавай махсус конкурсда Эдик Агьмедов гъалиб хьана. 50 кг-дин заланвал авай пут ада 32 сеферда хкажна. Азим Абакарова 2-чка кьуна (20 сеферда хкажна). Кьве спортсменни СтIал Сулейманан райондай я. Къейд авун лазим я хьи, Дагъустандин чемпионвилин тIвар Э.Агьмедова гила 6-сеферда къазанмишнава.
Акъажунра гъалиб хьайибуруз ва приздин чкаяр кьурбуруз кубокар, медалар, грамотаяр ва къиметлу пишкешар гана.
Рагнеда Рамалданова
