Махачкъала шегьердин администрациядин кьил Юсуп Умавова меркездин Кировский районда авай цIийиз туькIуьр хъувунвай «Березка» пляж ачухунин мярекатда иштиракна.
— Лугьун лазим я хьи, эхиримжи йисара шегьердин гьукумдин органри и пляждиз са артух фикир гузвачир. Алатай йисуз авадан ийидай майданар хкягъуниз талукь яз сесер гун тешкилайла, шегьерэгьлийри «Березка» пляждин тIвар кьунай. Шегьердин талукь идараяр алай йисан майдин вацра агьалийри ял язавай гьуьлуьн кьер авадан ийиз эгечIна. Къе инаг михьиз дегиш хьанва ва жуьреба-жуьре яшарин агьалийривай ина чпин азад вахт акъудиз жеда, — лагьана Ю.Умавова, пляж ачухдайла.
Меркездин Кировский райондин администрациядин кьил Салигь Сагидова къейд авурвал, и майдан гьам шегьерэгьлияр, гьамни мугьманар патал ял ядай лап хуш чкадиз элкъведа.
«Чаз аквазвайвал, Махачкъаладин гьукумдин органри шегьерэгьлийрин яшайишдин шартIар хъсанарун патал тухузвай кIвалахдихъ нетижаяр жезва. Кьве гьафте вилик Редукторный поселокда инсанри ял ядай гегьенш майданар кардик кутуна. Идалай гуьгъуьниз Элтавдин тама туькIуьрзавай паркни ачухда. Инанмиш я хьи, шегьерэгьлийрин яшайиш хъсанарун патал тухузвай кIвалахдиз инлай кьулухъни еке фикир гуда», — алава хъувуна Сагидова.
«Березка» пляждал цIийи хъувунин кIвалахар «Шегьердин къулай шартIар арадал гъун» программадин куьмекдалди кьиле тухвана.
Чи мухбир
