2,7 млрд манат
Дагъустандин гьукумдин кьилевайбуру 2024-йисуз чпиз яшайишдин рекьяй тайин тир кьезилвилер (льготы) талукь тир агьалияр патал дарманар къачунин сережемриз, алатай йисарив гекъигайла, рекорддин кьадарда аваз пулдин такьатар чара ийида. Идакай, РД-дин Гьукуматдин пресс-къуллугъдал асаслу яз, «Интерфакс-Юг» изданиди хабар гузва.
Чешмеди къейдзавайвал, кьилди къачуртIа, винидихъ къалурнавай макьсадриз 2,7 млрд манатдив агакьна такьатар ахъайда.
Кардик кутада
Дагъустандин рекьера мад кьве чкадал улакьрин заланвал ахтармишдай махсус постар кардик кутада. Госзакупкайрин материалра къалурнавай делилралди, абур Къарабудахкент ва Къизилюрт районра арадал гъида. Санлай къачурла, эцигунрин кIвалахриз 300 миллион манатдив агакьна пулдин такьатар харж ийидайвал я. Идакай «Дагъустандин экономика» телеграм-каналди хабар гузва.
Чешмеди къейдзавайвал, ихьтин тадаракар кардик кутунин нетижада рекьера аварийрин гьалар арадал атунин дуьшуьшрин кьадар ва рекьериз жезвай хасаратвилер тIимил жеда.
Къимет хуьн патал
Махачкъала шегьердин администрациядин кьилевайбуру цIийи автобусра рекьин гьакъидин къимет агъуз дережада хуьн патал 182 миллион манат харжда. Идакай «Дагъустандин экономика» телеграм-каналди хабар гузва.
ИкI, 2023-йисан эхирдалди республикадин меркездин умуми улакьрин паркуна цIийи автобусрин кьадар 47 уьлчмедин артух жеда.
Чешмеди къейдзавайвал, и улакьар кондиционерралди, «ГЛОНАСС» къурулушдалди, хабарар гудай экрандалди ва маса тадаракралди таъминарнава.
Автобусра рекьин гьакъидин къимет 20 манатдин кьадарда аваз тайинарун фикирдиз къачунва. Винидихъ къейднавайвал, рекьин гьакъи и дережада хуьн патал шегьердин администрациядин кьилевайбуру 182 миллион манат пулдин такьатар субсидия хьиз чара ийида.
Гьазурайди — Муса Агьмедов
