Дидейрин югъ! Чна къейдзавай гзаф кьадар суваррин арада и йикъа кье­­тIен чка кьазва, вучиз лагьайтIа, несилрилай несилралди гьар са касдиз диде – им уьмуьрда виридалай­ни кьилин, багьа, пак инсан я. Диде хьуникди дишегьлиди вичин тIе­бии лап хъсан къилихарни ерияр ачухзава:­ регьимлувал, кIанивал, къай­гъударвал, сабурлувал ва бала­ патал гьатта чанни къурбанд ийиз­ гьазурвал. Вири дуьньяда къейдза­вай и сувар уьмуьрдин­ эбе­ди­ви­лин­ди я. Гьелбетда­, диде садрани­ рикIелай алудна виже къведач, амма и юкъуз дидейрин патав фена,­ абурун хатур къачуниз, абуруз кIани­вилин хуш гафар лугьуниз, пишкешар гуниз чун буржлу я.

ЧIехи бубайрилай инихъ адет хьанвайвал, дишегьлидин, дидедин ихтиярарни мумкинвилер аялар хунин, ­тербияламишунин, къул хуьнин кIва­лин кIва­лахралди сергьятламишзавай.  Алай девирдин дишегьлиди, дидеди ла­­гьайтIа, хивевай и крарилай алава, итимрихъ галаз санал кьиле тухун тийизвай кар авач — политикарни, алимарни, лётчикарни, журналистарни, маши­нистарни, идарайрин регьберарни, гьатта аскерар­ни я абур. Муаллимрикайни духтуррикай, алверчийрикайни яшайиш­дин хи­лен­ къуллугъчийрикай гьич рахадач: жемиятда жавабдар и къуллугърин 70-80 процент дишегьлийри – дидейри бажармишзава­. Зурба алимар, пагьливанар, игитар хаз­вай­бур, тербияламишзавайбурни ди­шегьлияр я эхир.

Куьтягь тежер кIвалин вири крарни, гьукуматдин къуллугъарни ийиз, гьикI агакьзава, алакьзава абурулай?! Тажуб жедай кар я. Ахпа лугьуда хьи, абур итимрилай зайиф я. Эхь, дишегьлияр – дидеяр инсаниятдин лап гуьзел, назик, мегьрибан ва гьа са вахтунда виридалайни къуватлу ва лигимлу пай я. Гьавиляй чна дидейриз, юкь агъузна, икрамзава.

24-ноябрдиз Ахцегь РДК-дин чIехи залда дидейрин йикъаз талукьарнавай­ чIехи концерт хьана. ГъвечIи зал-фой­еда изобразительный школадин, аялрин яратмишунрин кIвалин ва жегьил натуралистрин станциядин аялрин гъилин яратмишунрин кIвалахрин выставкаяр тешкилнавай.

Райадминистрациядин тапшуругъ­далди культурадин управленидин кол­лективди  гьазурай шад мярекат рай­он­дин гьевескар артистрин дестеди «СВО-дин аскер дидедихъ галаз гуьруьшмиш хьун» сегьне къалурунилай ачухна. Чпин рухвайри дяведин махсус серенжемда къуллугъзавай дидеяр теклифдин билетралди залда ацукьарнавай. Ахпа райондин культурадин управленидин начальникдин заместитель Сулейман Сулейманова микрофондихъ «Ахцегь район» муниципалитетдин кьил Абдул-Керим Палчаеваз теклифна.

– Гьуьрметлу дидеяр, къенин суварин югъ за квез жуван ва райондин вири руководстводин патай рикIин сидкьидай мубаракзава. Къуй квехъ чандин сагъвал, рикIин динжвал хьурай! Дяведа викIегьдаказ къуллугъуналди­ Ватан хуьзвай куь рухваяр сагъ-саламатдиз ва гъилибвал гваз хтурай! Чна абурухъ галаз датIана алакъа хуьзва. Квез, гъиле яракь аваз Ва­тандин таъсиб хуьзвай рухвайрин дидейризни уьмуьрдин юлдашриз зи ­кабинетдин ва кIвалин ракIарар гьамиша ачух я ва алакьдай вири жуьредин куьмекар гуз чун гьазур я, – лагьана ада.

Гуьгъуьнлай мярекатдал «РД-дин ди­шегьлийрин Союз» общественный тешкилатдай мергьяматлувилин «Дидейрин савкьат» се­ренжемда активнидаказ иштиракунай­ райондин образованидин ва культурадин идарайрин коллективринни регьберрин тIвар­цIел хтанвай чухса­гъул­дин чарар ва гьуьр­метдин грамотаяр вахкана.

Залдавайбурун гуьгьуьлар диде­ви­лин ва ватанпересвилин мани-ма­кьам­ралди райондин дишегьлийрин Союздин председатель, РД-дин культурадин лайихлу къуллугъчи Таира Муспагьовади, чкадин гьевескар машгьур артис­тар тир Назлу Шагьбановади, Эмирсултан Бигеева, Ренат Гъаниева ва масабуру шадарна. Концертда иштиракун дидейриз сувар мубара­кун патал РД-дин халкьдин артистка Фаризат Зейналова ва манидар Гуьльмира Алиевани атанвай. Залда авайбуру абурун гьар са нумра гурлу капар ягъуналди хушдиз кьабулна.

Дашдемир Шерифалиев