И гьафтеда Махачкъалада СВО-дин Игит Алексей Сухановаз гуьмбет ачухна. Мярекатда РД-дин Кьил Сергей Меликовани иштиракна. «Акьалтзавай несилдиз Суханов хьтин кьегьалрикай ахъаюн ва абур рикIел хуьн важиблу кар я. Гьавиляй чна адан тIвар ганвай школадин патав сквер, гуьмбет ачухзава. Чи Ватандин ислягьвал, секинвал хуьн патал вичин чанни гьайиф татай Алексей Суханов чна гьамиша рикIера хуьда», — лагьана республикадин регьберди.
РикIел хкин, виликдай Махачкъаладин школайрикай садаз А.Суханован тIвар гайиди я.
Алексей Суханован регьбервилик кваз Донецк Республикадин Владимировка поселок патал душмандин пияда кьушунрихъ ва бронетехникадихъ галаз инсафсуз, къати женгер кьиле фенай. Батальондин командирди викIегьвал, дирибашвал къалуруналди, вичин аскерриз акьуллудаказ регьбервал гана. Абуру душмандин са шумуд гьужум алудна ва ахпа чебни гьужумдиз фена. Амма чпин командир галачиз. Ам женгина телеф хьана.
Чи мухбир
