Курхуьруьн агьалийриз Гьажиева Бесхалум гзаф кIандай кас тир. Ам 2015-йисуз чи арадай гьамишалугъ яз акъатна. Экуь дуьньядал 80 йисуз яшамиш хьана. Аял, жегьил-жаван вахтар адан хуьре акъатна. Бесхалум, хуьруьн юкьван мектебда кIелдайла, жемиятдин хийирлу крара, спортда, гьевескар артистрин коллективда лап активный иштиракчи тир. Манияр лугьунал Бесхалуман рикI гзаф алай. Хуьруьн клубда школьникри концерт гудайла, кимел алайбурни тадиз аниз фидай, адан назик ва ширин сесиналди лугьузвай манийрихъ нефес кьуна яб акалдай.
Мектебдилай гуьгъуьниз Бесхалумалай вузра кIелунар давамариз хьанач. Адан буба а вахтара тIвар-ван авай тракторист тир. Сифте яз Сталинан колхоздиз 1927-йисуз «Фордзон» маркадин трактор хкана, кардик кутур Мегьемедагъади рушан месэла масакIа гьялна, ам са кутугай чкадиз, Тажудин лугьудай касдиз гъуьлуьз гана. Адан диде Гуьзелхан хуьре савадлу кас тир. Араб чIалалди кIел-кхьин адаз хъсандиз чидай. Герек мярекатра иштиракдай. Тажудинанни Бесхалуман хизанда 4 аял – са гадани 3 руш чIехи хьана. Итим рагьметдиз фейила, кIвалин, хизандин дерди-балаяр, къайгъуяр Бесхалуман хивез аватна.
Амма дишегьлиди зайифвал къалурнач. Кьве гъилни къакъажна, колхоздиз кIвалахал фена. Зегьмет чIугуна виридахъ галаз паласайра, никIера, багълара четинвилериз дурум гуз вердиш хьана, лежбервилин пешеярни чирна. Хуьре клубдин дарамат эцигайла, ана кIвалахдай алакьунар авай культработник герек хьана. Яргъал фенач, клубдин заведующийвиле, ахпа директорвиле Бесхалум эцигна. Ада аниз жегьилар желбна, бажарагълу коллектив арадал гъана, виридаз чешне къалурна. Клуб къеце ва къене патарай герек гьар са затIуналди безетмишна. Гьевескар артистрин коллектив кIвачел акьалтна. Райондин килигунра, конкурсра, фестивалра иштиракзавай адан тIвар районда раиж хьана. Бесхалума вичини районрин арада республикада кьиле фейи конкурсра гзаф сеферра иштиракна. Адакай са шумудра гъалибчи хьана. Адаз гьуьрметдин 17 грамота, 12 диплом, соцсоревнованидин гъалибчидин значокар авай. 2001-йисуз Бесхалумаз «Дагъустандин культурадин лайихлу къуллугъчи» лагьай тIвар гана.
Къе адан тIвар хуьруьнбуру, гаф кватай чкадал «чи Бесхалум» лугьуз, гьуьрметдивди рикIел хкизва. Бесхалуман руш Селиматни алай вахтунда районда машгьур артист-манидар я. Устадвилелди манияр лугьузвай ам райондин «Куьре» тIвар алай художественный самодеятельностдин активный иштиракчи я.
Райсудин Набиев,
зегьметдин ветеран
