И йикъара Дагъустандин карчивилиз куьмек гунин центрада Республикадин 14-17 йис хьанвай жегьилрин арада карчивиляй кьиле тухвай олимпиададин гъалибчийриз пишкешар гунин мярекат кьиле фена. ИкI, олимпиададин эхиримжи паюна гъалибвал къачурбурун арада Махачкъаладин 38-нумрадин гимназиядин ученик Мугьамед-Али Алиев (1-чка), Къизилюртдин 8-нумрадин СОШ-да кIелзавай Муса Мусаев (2-чка) ва Каспийскдин 11-нумрадин гимназиядин ученица Анастасия Саблина (3-чка) ава.
РД-дин карчивилиз куьмек гунин центрадин директор Иса Мигьидинова жегьилриз агалкьунар тебрикна ва абурув къиметлу пишкешар – планшет, «акьуллу колонка» ва смарт-сят, гьакIни мектебар патал тупар вахкана.
РикIел хкин, республикада 31-майдилай башламишна карчивилин кIвалахрин бинейриз талукь онлайн-олимпиада кьиле фена. Ада региондин вири районрай ва шегьеррай жегьилривай иштиракиз жезвай. 8-ноябрдиз Махачкъалада кьиле фейи эхиримжи паюнин имтигьанар, сифтегьан паярай нетижалудаказ экъечIай 150-далай гзаф жаванри вахкана. Нетижада пуд гъалибчи хкяна.
Кьиле фейи конкурсрин кьетIенвилерикай 15-ноябрдиз «Дагъустандин жегьилар» газетдин майдандал кьиле фейи гуьруьшдин вахтунда Иса Мигьидинова, гьакIни Муса Мусаевани Анастасия Саблинади суьгьбетна.
Центрадин директордин малумарайвал, олимпиада тешкилунин асул макьсад жегьилрин арада карчивилин кеспидин машгьурвал артухарун, гьакIни абур и кеспидив акьуллудаказ, кьил-кьилеллаз, гьевеслудаказ эгечIун важиблу тирдан гъавурда тун тир. Олимпиададин вахтунда малум хьайивал, жегьил дагъустанвийрихъ карчивилин хилез талукь гзаф кьадар итижлу фикирар, проектар, теклифар ава. И теклифрин тереф хуьн, абуруз проектар кьилиз акъудунин карда куьмек гун И.Мигьидинова хиве кьуна.
— Чи республикада жегьилар карчивилин кеспидал къвердавай гзаф машгъул жезва. Олимпиада кьиле тухуналди, чавай инанмишвилелди къейд ийиз жеда: вилик эцигнавай макьсадрив чун агакьнава. Жегьил карчийри тестар вахкунин карда хъсан нетижаяр къалурнава, мастер-классра активнидаказ иштиракна, абуру месэладиз итиж ийизвайди аквазвай, — лагьана центрадин директорди. Ада хабар гайивал, республикадин гзаф муниципалитетра МСП корпорациядай савадлувилин мярекатар кьиле тухузва.
— Хсуси кар гъиле кьаз кIанзавай карчияр патал чна «Карчивилин азбукадин» мярекатар тешкилзава. Чирвилер гунин пай акьалтIарайла, чеб кьилдин карчияр яз регистрация авунвайбуру карчивилин кIвалахдин школадин курс акьалтIарзава – ада анжах кардик квай МСП-ри иштиракзава, — лагьана ада.
Анастасия Саблинади ва Муса Мусаева чпин гележегдин планрикай суьгьбетна. Малум хьайивал, жегьилриз хсуси кагьвеханаяр ачухдай, гьакIни экотуризмдин хиле кIвалахдай фикирар ава.
Жасмина Саидова
