15 йис къейдна
16-ноябрдиз Каспийск шегьердин «Азимут» мугьманханадин майдандал «Норд Винд» («Кеферпатан гар») авиакомпанияди вичин 15 йис тамам хьунихъ галаз алакъалу шад мярекат къейдна. Сувар мубаракиз кIватI хьанвай мугьманрин вилик «Норд Винд» авиакомпаниядин генеральный директордин заместитель Антон Маттиса Махачкъаладин международный аэропортуна 2021-2023-йисара кьиле тухвай кIвалахдин нетижаяр кьуна ва гележегдин планрикай суьгьбетна. Мярекатда гьакIни Махачкъаладин аэропортунин генеральный директор Саид Рамазанова, РД-дин туризмдин ва художественный сеняткарвилерай министрдин заместитель Анна Безруковади, РД-дин транспортдин ва рекьерин майишатдин министерстводин управленидин начальник Кьасум Мегьамедова, Кеферпатан Кавказдин федеральный округда «Пегас Туристик» туроператордин директор Илона Чиханацкаяди иштиракна.
— Чна Махачкъаладин аэропортунай лув гунин программа сифте сеферда 2021-йисуз гъиле кьунай. А чIавуз чна рейсер пуд рекьяй тамамарзавай, абурукай сад Москвадиз тир. 2022-йисуз программадик цIийи гьерекат кутуна ва лув гудай рекьер 6-дав агакьарна. Алай йисуз лагьайтIа, чна инай – чи авиакомпания патал бинелубурукай сад хьанвай Махачкъаладин аэропортунай 15 рекьяй цIийи маршрутар кардик кутунва. Санлай къачурла, чна Дагъустандин аэропортунай тамамарзавай вири рейсерин 24 процент тешкилзава. 2024-йисуз «Норд Винд» компанияди Дагъустан, гьакIни Кеферпатан Кавказдин маса республикаяр Россиядин гьар жуьре регионрихъ галаз гьавадай алакъалу авунин кIвалах активнидаказ давамарда. ИкI, Махачкъаладай башламишзавай рейсерин кьадар 21-дав агакьарда – алукьзавай йисалай инай Сыктывкар, Нижневартовск, Саранск, Киров, Иваново ва Оренбург шегьерриз цIийи рекьер ачухда. Идалайни гъейри, икьван чIавалди авай рекьерани тамамарзавай рейсерин кьадар артухарда: Тюмендай -гьафтеда 3 сеферда, Уфадай – 5 ва Казандай — 7 сеферда (гьар юкъуз). ИкI, «Норд Винд» Дагъустандин кьилин авиакомпаниядиз элкъведа ва Махачкъаладин аэропортунин пудан са пай – 427 агъзурдалай гзаф пассажирар тухуда. Гъавурда гьатун важиблу я, инал ихтилат физвайди регионриз тамамарзавай рейсерин пуд са паюникай я, яни Москвадиз тухузвай-хкизвайбур гьисаба кьазвач. Мисал яз, алатай 2022-йисуз «Уйташ» аэропортунай фейи вири пассажиррин санлай къачур кьадар 2,5 миллиондилай алатна. Махачкъаладин аэропортуна компаниядин Boeing 737-800 жуьредин кьве самолет жеда, — къейдна Антон Маттиса.
Вич арадал гъайи 2008-йисалай инихъ «Норд Винд» авиакомпанияди 317 агъзурдалай гзаф рейсар тамамарнава ва 56 миллион пассажир тухванва. Компанияди Россиядин гражданвилин ва регионрин авиациядин базарда кIвенкIвечи чкайрикай сад кьазва.
— За инал чи амадагрихъ элкъвена разивилин келимаяр лугьуз кIанзава – ихьтин нетижайрив чун абурун куьмекдалди агакьнава. Сифтени-сифте къейд ийин, и кардик еке пай Махачкъаладин аэропортуни кутуна. Чна абуру чи теклифрин тереф хуьзвайди ва абур кьилиз акъудун патал вири къуватар желбзавайди гьиссзавай. Чи кьилин амадагрикай яз заз РД-дин туризмдин ва художественный сеняткарвилерай министерстводин тIварни кьаз кIанзава, — лагьана А.Маттиса.
Инал къейд ийин, «Норд Винд» авиакомпаниядин рейссрал акьалтзавай асул пар таъминарзавайди «Пегас Туристик» компаниядин пакетдин, яни са шумуд жуьре хилерай къуллугъар фикирда кьуна туькIуьрнавай сиягьатдин турар я. Гьам сиягьатрин гьамни Каспий гьуьлел ял ягъунин турар Москвадин, Санкт-Петербургдин ва я Россиядин маса чIехи шегьеррин аэропортарай башламишун теклифзава.
Мярекатдал гаф къачур Саид Рамазанова «Норд Винд» авиакомпаниядихъ галаз кIвалахунал вич рази тирди къейдна ва гележегда и карда мадни еке агалкьунар хьуник умуд кутунвайдакай лагьана.
Мярекатдин сергьятра аваз авиакомпаниядин 2023-йисуз лув гунин программа гегьеншарунин кардик пай кутур асул амадагриз, туризмдин хиле кIвалахзавай карханайриз, гьакIни СМИ-рин векилриз шабагьар гунин церемония кьиле фена. Ихьтинбурун арада «Лезги газетдин» редакцияни авай.
Жасмина Саидова
