Региондин «Зи Дагъустан – зи рекьер» программадин сергьятраваз эхиримжи 2-3 вацран муддатда Ахцегьа Къ.Палчаевадин (яргъивал – 1027 метр, майдан – 6038 кв.м.), М.Мусаеван (355,5 м.; 2130 кв.м.), А.Мурсалован (536,8 м.; 3505 кв.м.) тIварарихъ галай ва Ленинан шегьредик акатзавай са гъвечIи куьче (137,7м.; 695 кв. м.) бинедилай ремонтна (гегьеншарна, аник квай хъвадай ва дигидай цин турбаяр дегишарна, цIийи шалманар акIуруналди, йифен эквер куькIуьрна) ва анра къир цана.
Санлай вичин яргъивал 2 километрни 57 метр тир рекьин майдан (12 368 кв.метр) вижевайдаказ туькIуьрунин умуми къимет 19 579 782 манатдиз барабар хьана. Адакай анжах са процентдилай артух (207 795 манат) — чкадин, амай вири такьатар республикадин бюджетрай гана.
Пудратчи «Ростехнострой» ООО-ди (директор — Абдулмежид Гьажиев) вахтунда ва ери аваз тамамарна вахкай кIвалахдилай жемят пара рази я. Винидихъ тIвар кьур махсус программадик экечIуналди, райцентрадин рекьер аваданламишзавай Ахцегь райондин кьиле авайбуруз ва кIвалахар кьиле тухвай устIарриз агьалийри пара кьадар сагърай лугьузва.
Къейд ийин, алай вахтунда Ахцегьа Шарвилидин ва Гагаринан тIварарихъ галай куьчейра къван твазва. Эхиримжи 2-3 йисан къене райцентрадин цIудав агакьна куьчеяр аваданламишнава. И кIвалах къведай йисузни давамардайвал я.
Дашдемир Шерифалиев
