Аскервилин, иллаки офицервилин пешедал Назим Набиеван рикI гъвечIи чIавалай алай. Офицерар адан мукьва-кьилийрикни ква. Назима вичикайни офицер хьун рикIивай кьетIна. Курхуьруьн юкьван школа хъсан къиметралди акьалтIарна, яргъалди фикирар тавуна, ам Владивосток шегьердин С.Макарован тIварунихъ галай Высший военно-морской училищедиз гьахьна.
Курсант хьайи сифте йикъалай ада хъсандиз кIелиз, ахлакь мягькемариз, гьар са карда вичелай чешне къалуриз хьана. Ина кьве йисуз кIелайдалай кьулухъ, амай пуд йисуз кIел хъийиз 30 курсант, абурук кваз Назимни, Севастополдин П.Нахимован тIварунихъ галай училищедиз ракъурна. Ада вири четинвилериз дурум гана, вичихъ вири рекьерай хъсан гьазурвал авайди къалурна.
Назим Набиева офицердиз гележегда къуллугъдал герек къвезвай чирвилер къачуна. Ам военный четырехборьедай мастервиле кандидатни я.
Мукьвара Назим, училище агалкьунралди куьтягьна, отпускдиз лейтенантвилин чинда аваз диде-бубадин патав хтана. Ам ракетный комплексдин расчетдин командир я. Отпуск куьтягь хьайила, жегьил офицерди Мурманский областда къуллугъ давамарда.
Чна Назим Набиеваз, училище куьтягьна офицервилин чин къачун мубаракзава. Ада инлай кьулухъни хъсандиз къуллугъдайдахъ чун инанмиш я.
Лагьана кIанда, адан стха Балагъани прапорщик я. Ада Ростовский областда самолетар ахтармишдай инженер яз са частуна къуллугъзава.
Райсудин Набиев
