“Лезги газетдин” алатай йисан 16-февралдиз акъатай 7-нумрада Украинадин Харьков шегьерда авай лезгийрин культурадин “Самур” обществоди “Лезги газетдин” иштираквални аваз документальный фильмайрин международный “Лезги хуьр” конкурс малумарнавайдакай хабар ганай.
Алай йисан 31-июлдиз сятдин 12-даз Махачкъалада “Лезги газетдин” редакцияда конкурсдин нетижаяр кьуниз талукьарнавай мярекат кьиле фида.
“Лезги хуьр” конкурсдин тешкиллувилин комитетди хабар гайивал, финалдиз пуд автордин — Седакъет Керимовадин, Сади Омарован, Исамудин Агьмедован 4 фильм акъатнава. Абурукай вуж гьи чкадиз лайихлу хьанатIа, 31-июлдиз тайин жеда.
Къейд ийин хьи, конкурсдин комиссиядик лезгийрин культурадин “Самур” обществодин председатель Агъаверди Адилов, Украинадин образованидин ва культурадин лайихлу работник Геннадий Амирбегов, “Лезги газетдин” кьилин редактор Мегьамед Ибрагьимов, “Самур” обществодин членар — Бедел Беделов, Айнудин Мамедов, Жамирзе Жамирзоев, Гьамзат Гьамзатов, Къадир Адилов ва Феликс Нагъиев ква.
«Лезги газет»
