3-ноябрдиз Дагъустандин шегьеррани районра СВО-да телеф хьайи аскерар рикIел хуьнин 14 багъ кутуна. Серенжемра сиясатдин деятелри, женгера чан гайи дагъустанви аскеррин багърийри ва масабуру иштиракна.

Дагъустандин муниципалитетра «РикIел хуьнин багълар» кутунин патахъай РД-дин Кьил Сергей Меликова тапшуругъ ганай. «Дидейрин къуват» кIватIалдин регьбер Сефижат Мегьамедрасуловади къейд авурвал, вири серенжемар тешкилунин, кьиле тухунин карда муниципалитетра и кIватIалдин крарал гуьзчивал тухузвай векилри иштиракна.

СВО-дин иштиракчийрин къаматар рикIел хуьн патал багълар Дербент, СтIал Сулейманан, Хив, Къайтагъ, Сергокъала, Ботлих, Казбек, Къаякент, Къизляр, Леваши, Табасаран, Хасавюрт, Шамил, Къули районра кутуна.

Къейд ийин, 2022-йисуз арадал гъайи «Дидейрин къуват» кIватIалда дяведин махсус серенжемда телеф хьайи аскеррин дидейри, уьмуьрдин юлдашри, вахари иштиракзава.

«Лезги газет»