Алай гьафтедин саласадиз Дагъустандин Кьил Сергей Меликова кьиле тухвай нубатдин совещанидал ЖКХ-дин объектар хъуьтIуьз гьазур хьунин, здравоохраненидин дараматар, гьа жергедай яз фад кардик кутаз жедай модулдин къурулушар эцигунин месэлаяр веревирдна. Идакай «Лезги газетдиз» РД-дин Кьилин пресс-къуллугъди хабар гана.
Жемиятдинни сиясатдин гьаларикай
Республикадин жемиятдинни сиясатдин гьалар веревирд авунилай башламишай совещанидал РД-дин Кьили рикIел хкана хьи, аэропортуна хьайи агьвалатриз уьлкведин регьбердини, республикадин кьиле авайбуруни, майилвал авай ватандашрини къимет гана. Къиметни адакай ибарат я хьи, а жуьредин серенжемар медени жемиятдиз лайихсуз я ва ахьтин гьерекатар Дагъустанда тикрар таххьун герек я.
«ТIугъвал авай муддатда Сулейман Керимован ужунда Кеферпатан Кавказда виридалайни хъсан международный терминал эцигна. Аэропортуниз 285 миллион манатдин зиян хьана, гьа жергедай яз авиакомпанияр аэродром дегишаруниз мажбур хьунухь себеб язни. Мукьвара Каспийскдани Дербентда мумкинвилерал сергьят алай аялар сагъардай центраяр ачухай инсандивай, диндин макан эцигунин асас къаюмдивай ни багъишламишун тIалабда?» – суал гана Сергей Меликова, гайи зарардикай ихтилатдайла.
Региондин регьберди къейдна хьи, гьукум адалатлу хьана кIанда. «Адалатлувал къанунрал амална яшамиш жезвай ватандашар патал уьмуьрдин къулай шартIар тешкилуникай ибарат я, къанун чIуруналди и кардиз манийвал гузвайбурун хиве жавабдарвал гьатзава. Вири къанунрин сергьятра аваз яшамиш хьана кIанда!» – лагьана ада.
Гьа са вахтунда Сергей Меликова жемиятдин суалриз гьукумдин вири органри нетижалудаказ жаваб тагузвайдини якъин тирди лагьана. Талукь тир министерствойри, республикадин парламентдин депутатри тухузвай кIвалах артухарун герек я.
ХъуьтIуьз гьазур хьуникай
РД-дин Гьукуматдин Председателдин сад лагьай заместитель Манвел Мажонца хабар гайивал, электросетрин тадаракар зулунни хъуьтIуьн муддатдиз гьазурунин программадин бинедаллаз «Дагэнергоди» дестекар, трансформатордин подстанцияр, линияр цIийибуралди эвезунин ва трансформатордин подстанцияр ремонтунин крар кьиле тухузва. Гьукумдардин гафаралди, Махачкъалада туькIуьр хъувунин герек авай саки вири линияр ремонтунин пландик кутунва. Графикдал асаслу яз, фикирдиз къачунвай вири кIвалахар йисан эхирдалди акьалтIарун кьетIнава.
Республикадин шегьерра чими ийидай къурулушрин ери хъсанарун патал мулкар еримлу авунин фондунихъ галаз икьрарар кутIуннава. Кьилди къачуртIа, ихтилат ихьтин къурулушар куьгьне хьанвай Дагъустандин Огни ва Къизилюрт шегьеррикай физва.
Махачкъаладин мэр Юсуп Умавова меркездин дараматар чимивилелди таъминарзавай вири тешкилатри тамамдиз кIвалахзавайдакай хабар гана. Меркездин гзаф мертебайрикай ибарат вири кIвалер хъуьтIуьз гьазур я.
Дербент ва Докъузпара районрин агьалияр мекьи муддатда газдалди ерилудаказ таъминарунин макьсаддалди «Моздок – Къазимегьамед» магистралдин газопроводдилай «Белиж» ГРС-дал кьван вахтуналди тир турба кардик кутунин кIвалах 1-декабрдалди акьалтIарун фикирдиз къачунва. И карди газдин давление пуд сеферда артухардай мумкинвал гуда.
Газдихъ галаз алакъалу идарайрин, тешкилатрин векилри авур ихтилатрилай кьулухъ Сергей Меликова абуруз тайин тапшуругъарни гана.
Сагъламвилин къайгъуда
Гуьгъуьнлай РД-дин здравоохраненидин министр Татьяна Беляевади здравоохраненидин объектрин модулдин къурулушар кардик кутуникай, ишлемишуникай ихтилатна. ЦIи здравоохраненидин министерстводи модулдин 30 къурулуш маса къачунин ва кардик кутунин кIвалахар гъиле кьунва. Аник гьа жергедай яз ФАП-ар, амбулаторияр, поликлиникаяр, гьакIни участокдин азархана акатзава.
Совещанидин эхирдай Сергей Меликова Дагъустанда «РикIел хуьнин багълар» ачухуник пай кутурбуруз, серенжемра иштиракайбуруз сагърай лагьана.
Салим Салимов
