КьетIен везифаяр тамамарун патал Украинада дяведин махсус серенжем кьиле тухуз са йисни кIуьд варз я. Миллетбазрин гъиликай Донбассдин хейлин мулкар азадна­ва, амма гьеле женгер давам жезва. Россиядин кьушунар Авдеевка (инани миллетбазри, Артемовскда хьиз, мягькем сенгерар туькIуьрнава) шегьердин лап къваларив агакьнава ва абуру югъ-къандавай виликди­ гьерекатзава, кар алай чкаяр кьазва. Лугьузвайвал, Авдеевка азад авурла, Россиядин кьушунриз виликди гьужумдай рекьер михьиз ачух жеда. И кар кьатIузвай неонацистри ва къецепатан уьлквейрин бандитри, телеф жезвай кьван чпин аскерризни килиг тавуна, жезмай кьван оборона хуьзва.

Дяведин виридалайни пис ва туькьуьл лишан инсанар телеф хьунихъ галаз алакъа­лу я. Гьелбетда, женгера чи аскерар, команди­рарни хкатзава, абурал хирерни жезва. Абур рикIел хуьн чи виридан буржи я. И месэла рес­публикада хъсандиз эцигнава. Игит рухвайрин тIварцIихъ школаяр, куьчеяр язава­, мемориалдин кьулар, бюстар эцигзава, ри­кIел хуьдай багълар, паркар кутазва.

И йикъара СтIал Сулейманан райондин хейлин хуьрера  «РикIел хуьнин багъ» кутунин мярекатар кьиле физва. ЦIийи поселок хуьруьн Чернышевскийдин тIварцIихъ галай куьчеда авай Женгинин баркаллувилин паркуна «РикIел хуьнин багъ» кутуниз талукь мярекат 2-3-ноябрдин йикъара тешкиллудаказ кьиле фена. Ана райондин кьил Саид Темирханова, администрациядин къуллугъчийри, образованидин, здравоохраненидин идарайрин, жемиятдин, жегьилрин, диндин организацийри, ветеранри, СВО-да иштиракзавайбурун ва телеф хьайи кьегьалрин диде-бубайри, школьникри иштиракна.

Дербент районда «РикIел хуьнин багъ» кутазвай мярекатда райондин администрациядин кьил Мавсум Рагьимова, РД-дин Халкьдин Собранидин депутат Азад Гьажиева, райондин собранидин председатель Мажмудин Семедова, Дербент шегьердин собранидин председатель Гьасан Мирзоева, военный махсус серенжемдин иштиракчийри, жемиятдин организацийрин, «Ватан хуьзвайди» фондунин векилри, волонтерри, школьникри ва масабуру иштиракна.

Багъ Дагъустандин Огни шегьердинни Сабнова хуьруьн арада, «Кавказ» шегьредин къерехда жеда. КIватI хьанвайбуру емишдин 200 къелем кутуна.

— Чна къе кутунвай гьар са къелем чи государстводин аслу туширвал, чи халкьдин азадвал хуьн патал чпин чанар къурбанд авур гьар са кьегьал хва рикIел хуьнин лишандиз элкъведа, — лагьана М. Рагьимова.

«РикIел хуьнин багъ» кутун махсус серенжемда иштиракзавайбуруз гьуьрмет ­авунин, абурун игитвилер рикIел хуьнин лишан я

*  *  *

Махсус серенжемда иштиракзавай Рутул райондин Ихрекрин хуьряй тир Ильяз Султанмегьамедов гьукуматдин патай пуд шабагьдиз­ лайихлу хьанва. Ада Россиядин армиядин жергейра 2017-йисалай къуллугъзава. И вахтунда ада вич кар алакьдай, хивез жавабдар­вал къачудай, командиррин тапшуругъар ви­кIегьвилелди тамамарзавай аскер хьиз къалур­на. Махсус серенжемдани ам сифте йикъарилай ава, миллетбазрихъ галаз кьиле физвай женгерани ада усалвилиз рехъ гузвач. Гьа са вахтунда Султанмегьамедова са шумуд сеферда вичин юлдашар душмандин гуьллейрикай хвена, хер хьайибур саламат чкадиз агакьарна.

КьетIен жуьрэтлувилин, дирибашвилин иесидиз, Ватандал рикI алай, четин тапшуру­гъар чешнелудаказ тамамарзавай аскердиз командованиди «Женгера тафаватлувиляй», «Дирибашвиляй» медалар ва 4-дережадин Георгийдин хаш-орден ганва.

Отпускдиз хтанвай аскерди вичин багърийрихъ галаз хуш йикъар акъудна. Адан ими, спортдин къайдаяр авачир женгерай дуьньядин чемпион Кавказ Султанмегьамедов хтулдилай пара рази я. «За адал рикIивай дамахзава. Армияда къуллугъиз кIанзава лагьайлани, за адан тереф хвенай. ГъвечIи чIавалай ам викIегьвал квай, спортдал рикI алай гада тир. Гьа са вахтунда­ Ильяз пара дугъри, секин, дамах гвачир кьегьал я. Зун умудлу я, Ильяз хьтин аскерри къуллугъзавай чи армия гъалиб жеда. Къуй зи хтул­, махсус серенжемда авай вири кьегьалар сагъ-саламатдиз хтурай», — лагьана К. Султанмегьамедова.

Махсус серенжемда иштиракзавай Хив рай­ондин векилрини тафаватлу жедайвал къуллугъзава. Абурукай яз Радик Ибрагьимо­ва, Кебер Кеберова, Руслан Мирзекеримова аскервилин буржи гьакъисагъвилелди, намуслувилелди кьилиз акъудзава. Командирри вилик эцигзавай везифаяр гьикьван четинбур хьайитIани, гежел тевгьена тамамарзава. Миллетбазриз рикIелай тефидай ягъунар кьазва, Донбассдин мулкар душманрикай азадзава.

Женгера чеб лайихлудаказ, уьтквемвилелди тухузвай аскерар оборонадин минис­терстводи къиметлу шабагьралди къейднава. Радик Ибрагьимов «Аскервилин гьунарвиляй» 2-дережадин медалдин, Кебер Кеберов «Жуьрэтлувиляй» медалдин ва Руслан Мирзекеримов «ВикIегьвиляй» 2-дережадин медалдин сагьибар я.

И мукьвара К. Кеберовни Р. Мирзекеримов ял ягъиз багърийрин патав хтанвай. Абурухъ галаз Хив райондин администрациядин кьил Ярмет Ярметов, райондин собранидин председатель Садикь Исрафилов ва военком Сулейман Гьуьсейнов гуьруьшмиш хьана. Абуру аскеррихъ галаз махсус серенжем кьиле физвай гьалдикай, хсуси сагъламвиликай, хизанриз герек куьмек аватIа, гьадакай суьгьбетна.

— Чи райондин агьалийри куьн хьтин кьегьалрал дамахзава, — лагьана Я. Ярметова. — Куьне неикни Россиядин цIийи регионар, гьакI чи вири уьлквени хуьзва, дуньяда ислягьвал мягькемарунин кар кьиле тухузва. Куьн сагъ–саламатдиз ва гъалибчияр яз хтун чи мурад я.

Абад  Азадов