27-октябрдиз Махачкъалада, 60-нумрадин юкьван школада, «Дагъустанвияр – Россиядин Игитар» лишандик кваз Дагъустандин халкьдин шаир Расул Гьамзатов дидедиз хьайидалай инихъ 100 йис тамам хьуниз талукьарна республикадин меркездин школайра кIелзавай аялрин арада дявединни ватанпересвилин конкурс кьиле тухвана.
Адан тешкилатчи «Ватанди вал ихтибарзава» тIвар алай дявединни ватанпересвилин клуб тир. Серенжемда Дагъустандин милли сиясатдин ва динрин крарин рекьяй министерстводин къуллугъчи Аслан Асланова, РД-дин юстициядин министерстводин патав тешкилнавай общественный советдин председатель, Дагъустандин общественный палатадин эксперт, профессор Ислам Мегьамедова, «Халкьдин ополчение» ДРОО-дин штабдин командир, генерал-лейтенант Муталим Муталимова ва масабуру иштиракна.
Мярекат аялри спортдин военно-прикладной жуьрейрай (автомат чукIурунай ва кIватIунай, путар хкажунай, противогаз алукIунай, ченеяр акъудунай ва мсб.) чпин устадвал къалурунилай гатIунна. Яракь кIватIунай ва чукIурунай мастер-класс къалурна. Кьвед лагьай паюна аялри жуьреба-жуьре нумраяр къалурна, игитрин къаматар рикIел хкана.
Мярекатдал рахай А.Асланова, И.Мегьамедова ва масабуру акьалтзавай несил ватанпересвилин руьгьдаллаз тербияламишунин ва сагълам уьмуьр кечирмишунин жигьетдай ихьтин мярекатрин важиблувал къейдна.
Эхирдайни И.Мегьамедова школадив Россиядин Игит Нурмегьамед Гьажимегьамедован игитвиликай малуматар алай парта вахкана. А.Асланова школадин директор Иса Агьмедовав образованидин идарада «Ватанди вал ихтибарзава» клубдин филиал ачухун тестикьарзавай сертификат вахкудайла, и жуьредин филиалар неинки Махачкъалада, гьакI республикадин амай шегьерра ва районрани ачухдайдахъ инанмишарна.
Рагнеда Рамалданова
