29-октябрдиз Албаниядин меркез Тиран шегьерда 23 йисал къведалди жегьилрин арада кьуршахар кьунай дуьньядин чемпионат акьалтIна. И чемпионатда Россиядай тир 5 спортсменди грекринни римлуйрин жуьреда кьуршахар кьунай — 1 ва кьве спортсмендини 3-чкаяр кьуна. Дуьньядин чемпионвилин тIварцIиз лайихлу хьайибурун арада чи машгьур спортсмен Анвар Аллагьяровни (60 кг) ава. Гила дуьньядин кесерлу и майданда ада 3 — сеферда гъалибвал къазанмишнава. Аферин!
Гьайиф хьи, чи спортсменриз дуьньядин кесерлу майданра уьлкведин пайдах хкаждай ихтияр авач, абуру бейтереф атлетар яз чпин устадвал къалурзава. Ярумчух финалда чи ватанэгьлидиз Индиядай тир Сумит 9:4 гьисабдалди кумукьна. Адалай виликан кьве бягьсина А.Аллагьярова Венесуэладай (8:0) ва Саудрин Аравиядай (9:1) тир спортсменрал гъалибвал къазанмишна. Финалдин бягьсина лагьайтIа, Гуржистандай тир Ромео Беридзедивай са очкони къазанмишиз хьанач: бягьс 10:0 гьисабдалди акьалтIна.
РикIел хкин, А.Аллагьяров 2000-йисан октябрдиз Ахцегьа дидедиз хьана. Бубадин теклифдалди хайи хуьре А.Гъаниеван тIварунихъ галай ДЮСШ-да, гуьгъуьнлай Махачкъалада грекринни римлуйрин жуьреда кьуршахар кьунал машгъул хьана. 23 йисал къведалди яшда авайбурун арада дуьньядин чемпионатра ада идалай виликни кьве сеферда (2019 ва 2021-йисара) 1-чкаяр кьуна. Ам Россиядин, Европадин ва хейлин акъажунрин гъалибчи я.
Рагнеда Рамалданова
