Ахцегь районда – хъвадай яд

Ахцегь районда агьалийрив яд агакьарунин серенжем кьиле тухуда. Идакай РД-дин эцигунрин, архитектурадин ва ЖКХ-дин министерстводи хабар гузва. Къейдзавайвал, и проект кьилиз акъудунин къимет 132 миллион манатдиз барабар я.

Ведомстводин делилралди, цIийи водовод эцигунин нетижада са шумуд хуьр —  Цуругъ, Хуьруьг, Луткун, Кьакар ва Ахцегь – ерилу хъвадай целди таъмин жеда.

Къейдзавайвал, и серенжем республикадин бюджетдин гьисабдай кьилиз акъудзава. Алай вахтунда вичикай ихтилат физвай объектдин проектриз талукь кIвалахар кьиле тухузва.

15 процентдин артухарнава

Дагъустанди 2023-йисуз халидин саларин бегьер 15 процентдин артухарнава. ИкI, алай йисуз и жуьредин бегьердин кьадар 215,5 агъзур тонндив агакьнава. Идакай, РД-дин хуьруьн майишатдин ва недай суьрсетдин министерстводал асаслу яз, РБК-ди хабар гузва.

Чешмеди къейдзавайвал, алатай 2022- йисуз республикада халидин саларин бегьердин кьадар 187 агъзур тонндиз барабар тир.

Санлай къачурла, бегьер 7 агъзурдалай виниз гектардикай ибарат майданрилай кIватI хъувунва, юкьван гьисабдалди, 1 гектарди 296 центнер бегьер ганва. Хабар гузвайвал, халидин саларин магьсулар виридалайни гзаф Ногъай районда цанва – 2,5 агъзур гектар.

Дагъустандин хуьруьн майишатдин ва недай суьрсетдин минис­терстводин делилралди, кIватIнавай магьсулрикай 70 процент къарпузар ва 30 процентни гатун халияр я.

Чи метягьар хкязава

И йикъара Дагъустандиз атай Туьр­кме­нистандай тир делегациядин алишвериш­дин хилен кIвалах акьалтI хьана. ИкI, рес­пуб­ликадиз атанвай карчияр ва компанийрин векилар са шумуд юкъуз региондин алишверишдин мумкинвилерихъ галаз таниш хьана, абур ахтармишна.

Мугьманри иллаки недай суьрсетдин продукцийрал ва эцигунардай хиле ишлемишдай метягьрал фикир желбна.

Туьркменистандай атанвай делегация Дагъустандин экспортдиз куьмек гудай Центрадин руководитель Руслан Абаскъулиевахъ галаз санал Махачкъалада, Къизлярда ва маса муниципалитетра кардик квай карханайриз фена.

Нетижада, Туьркменистандиз Дагъус­тандай балугъар, гъуьр ва шуьшедин къапар тухун патал махсус икьрар кутIунна.

Р. Абаскъулиеван гафаралди, и кьве региондин арада экономикадин жигьетдай алакъа хьунин цIийи девир алукьзава. Халкьарин арада алишверишдин алакъаяр ва сада-садаз метягьар маса гунин кьадарар вилик вахтара агъуз аватнавай. Центрадин директорди къейд авурвал, гила лагьайтIа, и рекьяй кIвалах хъсандаказ вилик фидайди вилив хуьзва ва и кардиз Дагъустандинни Туьркменистандин арада гьуьлелай пар тухудай алакъа хьуни генани куьмекда.

РикIел хкин, «Лезги газетдин» виликан нумрада чна хабар гайивал, Дагъустандини­ Туьркменистанди и кьве региондин арада пар чIугвадай гими кардик кутунин месэла­ веревирд ийизва. И кIвалах 2023-йисан эхирдалди кьилиз акъудун фикирдиз къачун­ва. Алай вахтунда Туьркменистандин патай и кардиз талукь тир делилар вилив хуьзва.

Гьазурайди — Муса  Агьмедов