ЦIийи ктабар
Дагъларин уьлкведин халкьарин милли медениятдикай, адетрикай хъсан чирвилер авай, и жигьетдай вичин къелемдикай икьван чIавалди хейлин ктабар хкатнавай алим, профессор Шайдабег Айдабегович Мирзоева и мукьвара Махачкъаладин «Алеф» чапханада мад са ктабдиз экв къалурна: «Культура Дагестана – основа формирования человека» (народный кодекс этнокультурного воспитания) тIвар алай и важиблу ктаб алимди алатай йисуз къачур РД-дин Кьилин Грантдин такьатрин куьмекдалди, 500 экземплярдин кьадарда аваз акъуднава. Ам 356 чиникай ибарат я. Лап куьрелди лугьуз жеда: медениятдиз талукь ихьтин метлеблу ктабар чал тек-туьк гьалтзава.
«Медениятдиз гьахьун», «Дагъустандин меденият», «Дагъустандин халкьарин къанажагъдин меденият», «Дагъустандин ахлакьдин меденият», «Дагъустандин халкьарин физкультура», «Дагъустандин халкьарин зегьметдин меденият», «Дагъустандин халкьарин экологиядин меденият», «Дагъустандин халкьарин художественный меденият», «Этномедениятдин ивирар кьатIунунин рекьер» ва маса кьилери ктабда пешекар автордилай Дагъустандин медениятдин гзаф терефар ачухиз алакьнавайвилин гьакъиндай шагьидвалзава.
Дагъустандин мектебра халкьарин медениятриз, адетриз талукь тарсар кьиле тухун гзаф важиблу тирди тестикьаруналди, вич и рекьяй хейлин учебный пособийрин автор, тIвар-ван авай педагог яз, Шайдабег Мирзоева и месэла хцидаказ къарагъарна ва гьахъ винел ахкъудна. Чаз малум тирвал, мектебра идалай виликни КТНД-дин тарсар гузвайди тир. Ватанпересвилинни халкьпересвилин месэлайриз еке фикир ва къимет гана кIанзавай къенин аямда милли къанажагъ, адетар эвелимжи чкадал эцигун иллаки герек я.
Ш.Мирзоев хейлин шабагьрин сагьиб я. Алатай йисара хайи чIалан месэлайриз талукь яз кхьенвай маналу макъалайрай ам «Лезги газетдин» редакцияди тешкилнавай, алим-лингвист М.Гьажиеван тIварцIихъ галай премиядиз лайихлу хьана.
КIелдайбурун гегьенш къатариз итижлу ва хийирлу жедай цIийи ктаб мубарак авуналди, чна алимдиз илимдин, педагогикадин, медениятдин рекье мадни зегьмет чIугвадай ашкъи ва сагъвал хьун алхишзава.
Куругъли Ферзалиев
