Алатай киш юкъуз Каспийскда, «Ан­жи-арена» майдандал, туризмдин фес­ти­валь кьиле фена. Аниз Россиядин регионрай ва къецепатан уьлквейрай атанвай кьван мугьманриз килигайла, лугьуз жеда хьи, Дагъларин уьлкведи туризмдиз шегьре рекьер ачухнава. Разивилелди лугьуз жеда, идакай гзаф кьадар инсанрини хушвилелди менфят къачузва. Шаз республикадиз са миллиондилай гзаф туристар атана. Им, алатай йисарив гекъигайла, хейлин гзаф я.  Алай йисан 9 вацра Дагъустандиз атанвай ту­рист­рин кьадар 2 миллиондив агакьнава­.

— Чи республикада туризм йигиндиз­ вилик фидай гьалар чахъ авай тIе­би­ат­дин мумкинвилери арадал гъана, — къейд авуна мукьвара региондин Кьили. Гьа са вахтунда ада туристар акъваздай ва абуру тIуьн недай чкаяр, килигуниз лайих авай чкайрал фидай рекьер хъсан гьалда авачирдакай, килигдай майданар талукь тадаракралди таъмин туширдакай­, санитариядин ва хатасузвилин гьалар пайгардик квачирдакайни, туристар мадни желб авун патал килигуниз лайихлу чкайрикай малуматар гунни рикIелай ракъурна виже текъведайдакай лагьана.

Къе чаз малум тирвал, туристрин арада виридалайни машгьур чкаяр – Дербент, Сулакдин дагьар, Самурдин­ там, Гуниб, Хунзах, Ахцегь ва Шамил районар я. Республикадин мугьманри ­гьам промышленностдин ва хуьруьн майишатдин, гьамни яхдиз къекъведай­ ва спортдин туризмдиз, экотуризмдиз еке итиж ийизва. Экотуризмдин виридалайни машгьур чкаяр къумадин Сарыкъум тепе, милли «Самурский» заповедник я. ГьакIни алай йисуз гьуьлуьн къерехда тIебиатдин «Папас» тIвар алай комплекс арадал гъанва. Иниз, Яру ктабда­ гьатнавай гьайванар авайвиляй, турис­тар къвезва. Дербент районда респуб­ликадиз къвезвайбуруз вири жуьредин шартIар тешкилзавай ва туризмдин хел вилик тухудай курорт-шегьер арадал гъидайвал я.

Чи мухбир