Конкурс
Дагъустан Республикада “Зи Дагъустан” лишандик кваз идара ийидай кадрияр хкядай конкурсда иштиракун патал арзаяр кьабулунив эгечIнава. Идан гьакъиндай Махачкъалада кьиле тухвай пресс-конференциядал республикадин Кьилин везифаяр вахтуналди тамамарзавай Владимир Васильева малумарна.
Адан тапшуругъдалди конкурс Дагъустан Республикадин Гьукуматди коммерциядинди тушир “Россия — мумкинвилерин уьлкве” организациядин — Вирироссиядин идара ийидай кадрийрин “Россиядин башчияр” конкурс тешкилунал машгъул хьайи организациядин — куьмекни галаз кьиле тухуда.
Владимир Васильева Россиядин Президент Владимир Путинахъ галаз гуьруьшмиш хьайи чIавуз чи республикадани Президентди тешкилай саягъда кадрийрин резерв арадал гъунин кьвед лагьай пай кьилиз акъудунив эгечIнавайдакай суьгьбетна ва государстводин регьберди адан тереф хвена.
Пресс-конференциядал рахай Владимир Васильева Дагъустан идара авунин кIвалах хъсанарун ва регионда яшайишдин ери хкажун чарасуз тирди къейдна. “Чаз акьалтIай муракаб месэлаяр гьялун патал герек тежриба авай инсанриз теклифиз кIанзава. Им вичел инсанрин вил фадлай алаз хьайи лифт — гьам республикадин, гьам муниципальный гьукумдин лап вини дережайриз хкаж жедай мумкинвал гудай лифт я”, — лагьана республикадин регьберди.
Адан гафаралди, бажарагълу руководителар жагъурун, абур государстводин ва муниципальный идара ийидай къурулушрик кутун, здравоохраненидин, образованидин, энергетикадин, эцигунрин, транспортдин ва маса хилера абур кар алай къуллугърал эцигун пландик кутунва. Владимир Васильева и конкурсдихъ регион ва адан агьалияр патал гьихьтин метлеб аватIа къейдна: “Им Дагъустанди инсанрин яшайиш лап хъсанди хьуник ва чи уьлкве абад авуник умудар кутун лагьай чIал я. За квевай и важиблу кIвалахда иштиракун тIалабзава”.
Конкурсда къимет гунин алай аямдин къайдаяр — “Россиядин башчияр” конкурс кьиле тухудай чIавуз чпин менфятлувал къалурай къайдаяр ишлемишда. Къимет гудай къурулушдин руководитель Павел Безручкоди суьгьбет авурвал, “Зи Дагъустан” конкурсда иштиракун патал РФ-дин гражданвал ва куьтягьнавай кьилин образование аваз хьун герек я. “Зи Дагъустан” конкурс кьве паюникай ибарат жеда: идара авунин рекьяй авай мумкинвилер Онлайндин къайдада тестироватда ва идара авунин алакьунриз чин-чинал кьиле тухудай серенжемрин сергьятра аваз къимет гуда.
Конкурсдин макьсад идара ийидай кIвалахдин вини дережадин вердишвилер авай инсанар жагъуруникай ибарат я. Конкурсдихъ мад са мурад ава. “Чаз намуслу инсанар жагъуриз кIанзава. Чаз анжах са чпин хийирдихъ галтуг тавунвай, агьалийрин хушбахтвилин ва республика абад хьунин патахъай къайгъу чIугвадай ксар жагъуриз кIанзава. Мадни ачухдаказ лагьайтIа, и конкурс кьиле фидай чIавуз чун ахлакьдин жигьетдай дуьз рекьел алай, инициатива къалурдай, пешекарвал авай ксар жагъуриз чалишмиш жезва”, — лагьана ада.
Конкурс кьиле тухунин къайдайрал кIевелай амал авунал конкурсдин Гуьзчивалдай совет машгъул жеда. А советдиз Дагъустан Республикадин Кьилин патав гвай Агъсакъалрин советдин председатель Абдулла Мегьамедова регьбервал гузва.
“Гуьзчивалдай советдин председатель хьун — им еке ихтибар авун лагьай чIал я. Гуьзчивал авун — им конкурсдин серенжемар кьиле физвай гьал ахтармишун, веревирд авун ва гуьгъуьнлай жуван фикир республикадин Кьилиз раиж авун лагьай чIал я. Конкурсдин гуьзчивалдай советдик республикада гьуьрмет авай, машгьур ксар акатнава”, — лагьана Абудулла Мегьамедова.
Ада республикадин Гьукуматди властдинни агьалийрин арада авай ихтибарвал мягькемаруниз итиж ийизвайди къейдна. “Конкурс — им менфятлу рахунар тешкилунин, регион вилик тухунин кардал виридалайни лайихлу ксар желб авунин къайдайрикай сад я”, — лагьана Гуьзчивалдай советдин председателди.
Алай йисан гатфариз Дагъустан Республикадин идара ийидай кадрийрин резерв арадал гъунин рекьяй конкурс кьиле фена. Ана са агъзурдалай виниз инсанри иштиракна. Нетижада 61 касдикай ибарат яз кадрийрин резерв арадал гъана. Абурукай 14 кас республикадин государстводин ва муниципальный властдин органра регьбервал гудай къуллугърал тайинарнава.
Къейд авун лазим я хьи, арзаяр 29-июлдалди кьабулда. Конкурсда иштиракун патал мой — Дагестан 2018.РФ. сайтда гьахьун герек я.
Справка: “Зи Дагъустан” — им республикадин абадвал патал менфятлудаказ кIвалахиз алакьдай, вини дережадин пешекарвал авай руководителар хкягъунин мурадралди кьиле тухузвай кадрийрин конкурс я. Конкурсдин финалистар Дагъустан Республикадин кадрийрин резервдик кутада ва абуруз гележегда республикадин властдин органра ва идарайра кIвалахал акъваздай мумкинвал жеда.
“Россия — мумкинвилерин уьлкве” — им менфятлу ва адалатлу яшайишдин лифтерин кIвалах таъминарунихъ элкъуьрнавай проектар хкязавай, абурун экспертиза кьиле тухузвай ва абуруз къуват гузвай ачух платформа я. Проектрин платформа гележег авай идара ийидай къуллугъчияр, карчияр, жегьил пешекарар, волонтерар ва школьникар патал тайинарнавайди я.
Чи мухбир
