10-октябрдиз Дагъустандин Кьил Сергей Меликова Каспийдин рекъемрин международный форумдиз гьазурвал акунин ва кьиле тухунин рекьяй Тешкиллувилин комитетдин заседание кьиле тухвана.
Международный форум чи республикада 2 ва 3-ноябрдиз тешкилда. Азербайжандин, Ирандин, Къазахстандин, Туьркменистандин, Индиядин, Катардин, гьакIни Россиядин 40-далай виниз регионрин векилар зурба и мярекатдин иштиракчияр хьун вилив хуьзва.
Са тIимил вахт идалай вилик кIвалахдиз талукь месэлаяр аваз Москвадиз фейила Сергей Меликова форумдиз гьазурвал акунин месэлаяр Россиядин рекъемрин министр Максут Шадаевахъ галаз веревирднай.
Каспийдин рекъемрин международный форумдин кьилин тема, Сергей Меликова къейд авурвал, рекъемрин сервисар ишлемишуналди, «Север-Юг» улакьрин рехъ (коридор) еримлу авуниз талукь жеда.
Мярекатдихъ уьлкве патал стратегиядин метлеб авайдахъ инанмишвал къалурна Дагъустандин Кьили. Адан гафаралди, форум неинки цифровизация вилик тухудай майдан хьун лазим я, гьакIни ада Россиядин ва государстводин амадагрин, уьлкведин регионрин, бизнесдин, экспертрин сообществойрин арада диалог вилик тухузни куьмек гана кIанда.
Важиблу серенжемдиз гьазурвал акуникай РД-дин рекъемрин рекьяй вилик финин министр Юрий Гьамзатова лагьана. Ада хабар гайивал, «Север-Юг» проект уьмуьрдиз кечирмишунин сергьятра аваз рекъемрин сервисар ва платформаяр арадал гъунихъ галаз алакъалу тир кьилин темадилай гъейри, и хилен кар алай рекьерай кIвалахдай дестеяр кардик кутада: транспорт ва логистика, киберхатасузвал, туризм, экология.
Гиламаз махсус сайт арадал гъанва. Ана форумдиз талукь малуматар ава ва иштиракдайбурун регистрация кьиле физва. Гьукумдин органрин векилрилай гъейри, ана Россиядин, Ирандин, Азербайжандин, Къазахстандин, Туьркменистандин вузрин ва ахтармишунардай центрайрин делегацийрини иштиракун вилив хуьзва.
КIвалахдиз талукь паюнилай гъейри, форумдин иштиракчийриз культурадин программани къалурда. Планрик мугьманар региондин милли адетрихъ ва тарихдин метлеб авай чкайрихъ галаз танишарунни ква.
Сергей Меликова Дагъустандин са жерге министерствойрин кьилериз форумдиз гьазурвал акунин месэлаяр вири патарихъай ахтармишун теклифна.
Регина Семедова
