10-октябрдиз Дагъустан Республика­дин Гьукуматдин Председателдин за­­меститель Муслим Телякавов кьиле авай делегация Азербайжандиз мугьман хьана ва къунши уьлкведа­ Россиядин Федерациядин векил Михаил Евдокимовахъ галаз гуьруьш­миш хьана. Абуру кьве республи­ка­дин арада туризмдин, медениятдин­, спортдин, образованидин хилера­  ара­дал атанвай дуствилин, амадагви­лин алакъаяр веревирдна ва и ала­къаяр мадни мягькемар авуна, вилик тухвана кIанзавайдакай лагьана.

Муслим Телякавова Михаил Евдокимоваз Дагъустандин делегация Азербайжанда Расул Гьамзатован 100 йисан юбилейдиз талукь яз кьиле тухузвай шадвилин мярекатра иштиракиз атанвайдакай хабар гана. Гьа са вахтунда  вице-премьерди  Россиядин векилдиз Баку шегьерда Гьейдар Алиеван тIварунихъ галай маканда «Расул Гьамзатован булахар» лишандик кваз кьиле фидай музыкадинни эдебиятдин тамашадиз атун теклифна. Муслим Телякавова Михаил Евдокимоваз шаирдин юбилейдихъ галаз алакъалу яз чапнавай Расул Гьамзатован шииррин кIватIал ва Центробанкди акъуднавай  рикIел аламукьдай медаль пишкешна.

Къейд ийин хьи, гуьруьшда гьакIни РД-дин Кьилин ва Гьукуматдин Администрациядин руководителдин заместитель, РД-дин Кьилин пресс-къуллугъдин ва информациядин сиясатдин управленидин начальник Рашид Акавова, РД-дин  милли сиясатдин ва динрин крарин рекьяй министр Энрик Муслимова, Махачкъалада авай Россиядин къецепатан крарин министерстводин векил Марат Османова иштиракна.

Азербайжанда авай вахтунда Да­гъустандин делегация Расул Гьамзатован машгьур дурнайрин шикилар чIу­гунвай «1941-1945-йисар» монументдал фена, анал цуьквер эцигна. Дагъус­танвияр Баку шегьерда авай Урусрин кIвале Азербайжандин писателрихъ галаз гуьруьшмиш хьана.

Чи мухбир