22-25-сентябрдиз Хасавюрт райондин Къурушрин хуьруьн жуьмя-мискIинда Мугьаммад Пайгъамбардин (Аллагьдин патай салам ва салават хьурай вичиз) ва адан асгьабрин уьмуьрдихъ, яшайишдихъ галаз алакъалу пак, надир затIарин выставка кьиле фена. РД-дин муфтиятдин телеграм-каналди хабар гузвайвал, санлай къачурла, ана ядигарар яз багьаз хуьзвай 36 затIуниз килигдай мумкинвал авай.
Гьакъикъатдани, къурушвийрин уьмуьрда лишанлу вакъиадиз элкъвей и мярекатди республикадин жуьреба-жуьре пипIерай атанвай мугьманар сад авуна. Агъзурралди инсанриз Ислам диндин тарихдиз итижлу сиягьат авуналди, Пайгъамбардин (Аллагьдин патай салам ва салават хьурай вичиз), адан асгьабрин яшайишдихъ галаз алакъалу затIар чпин вилералди акуна.
Къейд ийин хьи, выставка ачухунин мярекатда Дагъустандин муфтийдин заместитель Агьмад Мегьамедова, Хасавюрт райондин кьил Арсланбег Алибегова, чкадин администрациядин кьил Рафик Юсупова ва масабуру иштиракна.
А.Алибегован гафаралди, выставка неинки са Хасавюрт район, гьакIни вири республика патал лишанлу мярекатдиз элкъвена. «Къуй и мискIинда кьиле физвай гьерекат себеб яз гьар са кас Пайгъамбардиз (Аллагьдин патай салам ва салават хьурай вичиз) мадни мукьва жедайвал хьурай. Иниз атай гьар са инсан иман мягькем хьана, хъсан фикирар аваз хъфирай», — лагьана ада.
«Выставкадиз атайла, рикIик са гьихьтин ятIани зурзун акатзава», — хиве кьуна вичин хвани галаз Къурушрин хуьруьз мугьман хьайи Къизляр шегьердин агьалиди.
Вичин хтулни галаз выставкадиз Буйнакск шегьердай атанвай агьалидивай шадвиляй вилин накъвар хуьз хьанач.
Диндин мярекатдиз бине Ботлих райондин Зило хуьряй тир чамни свас мугьман хьанвай. Малум хьайивал, мехъерин иштиракчияр Бабаюрт райондай Хасавюрт шегьердиз хъфизвай. Къурушдал выставка кьиле физвайдакай хабар хьайила, абур мехъерин кьилин игитарни галаз аниз атанвай.
Къейд ийин хьи, Къурушрин хуьряй выставкада эцигнавай пак затIар Шамилкъала поселокдиз хутахна.
Чи мухбир
