Арза галачиз тайинарзава
Алай йисан эвел кьилелай инихъ 7300 дагъустанвидиз набутвиляй гузвай пенсия арза галачиз тайинарнава. Идакай Дагъустандин Яшайишдин фондунин пресс-къуллугъди хабар гузва.
Набутвиляй страховой ва яшайишдин пенсияр вич-вичелай тайинарзавайди я. Яни фондуниз арза рекье тунин ва документар гьазурунин игьтияж авач. И месэла набутриз талукь тир федеральный реестрдин делилрал асаслу яз гьялзава.
Идарадин пресс-къуллугъдин векилди къейд авурвал, 2022-йисан 1-январдилай эгечIна уьлкведа набутвиляй арза галачиз пенсия тайинардай къайда кардик акатнава. Лагьана кIанда, набутвал тайинарай йикъалай гатIунна агьалидиз пенсия гуз эгечIзава. Федеральный реестрда вич-вичелай гьар са набут агьалидиз талукь делилар авайвиляй, арза кхьин, документар гьазурун герек жезвач.
34 станция эцигда
Дагъустанда 2024-йисуз электроавтомобилар зарядка ийидай 34 станция эцигун пландик кутунва. Идакай РД-дин энергетикадин ва тарифрин министерстводин пресс-къуллугъди хабар гузва.
Ведомстводин делилралди, 2023-йисуз ихьтин 3 объект эцигнава, санлай къачурла, республикада абур 6 ава. Станцийрал кардик кутунвай махсус тадаракрин гужлувал 22 кВт-диз барабар я.
Къейдзавайвал, электромобилар зарядка авунин инфраструктура гегьеншарун патал Дагъустандиз федеральный бюджетдай 25 миллион манат субсидия яз чара авунва.
Чпикай ихтилат физвай и объектар эвелни-эвел Махачкъала, Каспийск, Дербент шегьерра эцигун фикирдиз къачунва.
Министерстводин пресс-къуллугъда алава хъувурвал, алай вахтунда Дагъустанда саки 300 электромобиль ава. Гьа са вахтунда 2025-йисуз абурун кьадар 2,5 агъзурдав агакьун вилив хуьзва.
150 миллион манат харжда
Дагъустанда промышленный паркунин бинедал картонар ва чарарин затIар акъуддай «Фотон» тIвар алай фабрика эцигда. ЦIийи кархана эцигуниз санлай къачурла 150 миллион манат пул харжда. Идакай республикадин промышленностдин ва алишверишдин министерстводин пресс-къуллугъди хабар гузва.
Инвестициядин и проект кьилиз акъудзавайди «Каспий картон» ООО я. Карханадихъ къецепатан уьлквейрай гъизвай чарчин продукция чкадиндалди эвездай макьсад ава.
Сарин кластер эцигда
Дагъустанда сарин кластер арадал гъида, и кIвалахда республикадиз Подмосковьедин карханайри куьмек гуда. Идакай РД-дин хуьруьн майишатдин ва недай суьрсетдин министерстводин телеграм-каналда хабар гузва.
Къейдзавайвал, и проектдихъ хъсан нетижаяр жеда. Малум тирвал, куьлуь карч алай гьайванрин кьадардал гьалтайла, Дагъустан Урусатда 1-чкадал ала. Уьлкведа авай куьлуь карч алай гьайванрин умуми кьадардикай 24 процент республикадал ацалтзава. Идалайни гъейри, уьлкведа гьар йисуз кIватIзавай сарин умуми кьадардикай 25 процент Дагъустанда ава.
Чешмеди къейдзавайвал, и хиле кар алай месэлаяр гьялдай рекьер тайинарнава, кьилди къачуртIа, сарин продукция маса гунин кIвалахдиз ва ам гьялунин (переработка) кар вилик тухуниз куьмек гун кьетIнава.
Гзаф жеда
Пешекарри виликамаз авунвай гьисабралди, Дагъустанда алай йисуз 360 тонн картуфар кIватI хъийида. Идакай РД-дин хуьруьн майишатдин ва недай суьрсетдин министерстводин пресс-къуллугъди хабар гузва.
Ведомстводин делилралди, 2022-йисуз 17,6 агъзур гектардин майдандай 332,4 агъзур тонн картуфар кIватI хъувунай (1 гектардай — 188,7 центнер бегьер). Гьа икI, алай йисуз бегьердин кьадар 8,3 процентдин гзаф жедайдак умуд кутазва.
Вири уьлкведа хьиз, Дагъустандани картуфар арадал гъунал ЛПХ-яр машгъул я. И хиле кар алай кIвалах Леваши, Акуша, Буйнакск, Хасавюрт ва Хив районри кьиле тухузва.
Санлай къачурла, 2023-йисуз Дагъустанда картуфар цанвай майданрин кьадар 19,1 агъзур гектардиз барабар я.
Гьазурайди — Муса Агьмедов
