Уьлкведа Дагъустандин халкьдин шаир Расул Гьамзатован 100 йисан юбилейдиз талукьарнавай мярекатар давам жезва. 28-сентябрдиз Москвада, Кремлдин Государстводин имаратда «Инсанар, инсанар – кьакьан гъетер…» лишандик кваз чIехи межлис кьиле фена.
«Лезги газетдиз» РД-дин Кьилин пресс-къуллугъди хабар гайивал, мярекатдиз атанвай гьуьрметлу мугьманрин арада РФ-дин Президент Владимир Путин, Федерациядин Советдин спикер Валентина Матвиенко, Дагъустандин регьбер Сергей Меликов, сенаторар, Госдумадин депутатар, жемиятдинни сиясатдин векилар ва масабур авай.
«Къадим авар халкьдин вафалу хва, Дагъустандин ва санлай вири Урусатдин руьгь. Ам Ватандин культурадин алемда къатидаказ нур гузвай гъед тир ва инлай кьулухъни гьакI яз амукьда. И чIехи касдихъ галаз гуьруьшмиш жедай, адан гьакьван девлетлу, метлеблу, дерин фикиррив ацIанвай, гьа са вахтунда зарафатни квай рахунрихъ яб акалдай мумкинвал хьунай за кьисметдилай разивалзава…», — лагьана Владимир Путина Расул Гьамзатовакай рахадайла.
Юбилейдин межлисдин сергьятра аваз Урусатдин эстрададин векилрин иштираквал аваз чIехи концертни тешкилнавай. Уьлкведин машгьур манидарри Расул Гьамзатован чIалариз кхьенвай манияр тамамарна.
Къейд ийин хьи, Дагъустандин халкьдин шаирдин юбилейдиз талукьарнавай мярекатар са жерге къецепатан уьлквейрани тешкилдайвал я. Абурун арада Белоруссия, Узбекистан, Къиргъизистан, Азербайжан ва масабур ава.
Агьмед Магьмудов
