Гьафтедин эвел кьилера РД-дин Гьукуматдин Председатель Абдулмуслим Абдулмуслимов, адан заместитель Муслим Телякавов ва республикадин бязи министерствойрин регьберар Белоруссиядиз мугьман хьана. Ина Дагъустандин делегацияди са шумуд гуьруьш кьиле тухвана.
«Лезги газетдиз» РД-дин Гьукуматдин пресс-къуллугъди хабар гайивал, 2-октябрдиз Абдулмуслим Абдулмуслимов Белоруссиядин культурадин министр Анатолий Маркевичахъ галаз гуьруьшмиш хьана. Меденият вилик тухуниз, акьалтзавай несилдиз руьгьдинни ахлакьдин тербия гуниз талукь месэлаяр веревирд авунилай гъейри, абур Белоруссияда Расул Гьамзатован 100 йисан юбилейдин сергьятра аваз кьиле тухузвай мярекатрикайни рахана.
«Заз Белоруссия гзаф кIанда, вучиз лагьайтIа ина Советрин Союздин виридалайни хъсан адетар хвенва. Куь уьлкведа Дагъустандин халкьдин шаирдин юбилей къейд авунал чун пара шад я. Мукьвара Урусатдин Президент Владимир Путина Р.Гьамзатован гафар рикIел хкана: «Дагъустанда зун – аварви, Урусатда – дагъустанви, уьлкведилай къецепата урус я». Гьакъикъатдани, ам чIехи инсанперес, ватанперес тир…», — лагьана гуьруьшдин вахтунда РД-дин премьер-министрди.
Анатолий Маркевича мугьманар тебрик авуналди, Дагъустандинни Белоруссиядин арада авай амадагвилин алакъайри хъсан нетижаяр арадал гъидайди къейдна.
«Чи арада авай дуствал мягькемди я. Гьар са месэладин жигьетдай чун сад-садан гъавурда акьазва. Урусатдихъ галаз чна медениятдин ва яшайишдин маса хилерай хъсан алакъаяр хуьзва. Квехъ галаз санал чна гьам белорусар, гьам Дагъустан, гьамни Урусат патал хийир авай итижлу проектар тайинардайдак, кьилиз акъуддайдак за умудар кутазва», — къейдна Белоруссиядин культурадин министрди.
Гуьруьшдин эхирдай А.Абдулмуслимова А.Маркевичаз савкьатар багъишна. Абурун арада Р.Гьамзатован эсеррин ктаб, юбилейдихъ галаз алакъалу яз Центробанкди акъуднавай «Расул Гьамзатов» медаль ва маса пишкешар авай.
И юкъуз республикадин премьер-министрди гьакIни Белоруссияда Урусатдин Векил Борис Грызловахъ галазни гуьруьш кьиле тухвана. Адан сергьятра аваз абуру къецепатан уьлкведа Расул Гьамзатован яратмишунриз талукьарнавай йикъар кьиле тухун ва Дагъустандинни Белоруссиядин арада авай алакъаяр мягькемаруниз талукь месэлаяр веревирдна.
А.Абдулмуслимова гуьруьшдал Дагъустанда, Москвада, Санкт-Петербургда халкьдин шаирдин юбилейдихъ галаз алакъалу яз кьиле фейи мярекатрикай ва Р.Гьамзатован юбилей Бакуда, Ташкентда ва къецепатан маса шегьеррани къейд ийидайдакай хабар гана.
Борис Грызлова Дагъларин уьлкведин чIехи шаир уьмуьрда халис ватанперес хьайиди ва ам неинки са Дагъустандин, гьакIни вири Урусатдин халкьарин дамах тирди къейдна.
Лагьана кIанда, Белоруссияда А.Абдулмуслимова мад са шумуд гуьруьш кьиле тухвана. Минскда Р.Гьамзатован юбилейдиз талукьарнавай яратмишунрин межлисда иштиракна. Абурукай гегьеншдиз РД-дин Гьукуматдин сайтдай кIелиз жеда.
Чи мухбир
