СтIал Сулейманан районда СВО-да телеф хьайи кьегьалрин экуь къаматар, игитвилер рикIера хуьнин лишан яз, абуру кIелай школайра мемориальный кьулар ачухна. Ихьтин мярекатар ЦIийи поселокдин, Кьасумхуьруьн 1-нумрадин, Птидхуьруьн ва Уллу-Гъетягърин школайра кьиле фена. Анра рагьметдиз фейибурун диде-бубайри, мукьва-кьилийри, хуьруьн агьалийри, школайрин муаллимри ва кIелзавайбуру, райондин администрациядин, военный комиссариатдин векилри иштиракна.
Вири школайра митингар Россиядин Федерациядин Гимн ягъунилай башламишна.
— Къе чна Ватан хуьн патал кьегьалвилер къалурай халис игитриз мемориальный кьулар ачухзава. Ватан кIеве авайла чи кьегьалри Россиядин экуь гележег патал чпин чанар къурбанд авуна. Тагьир Маметов (Цийи поселок) хьтин игит рухваяр хайи, тербияламишай диде-бубайриз башсагълугъвал гуз кIанзава. Кьегьалар телеф хьана, амма уьмуьр давам жезва. Абурухъ хизанар, аялар ама. Чна абурун гъам, дерт пайзава, вири рекьерай абуруз куьмекни гуда, — лагьана райондин кьил Саид Темирханова.
Лагьана кIанда, 37 йисавай Т.Маметов реактивный артиллериядин дивизияда взводдин отделенидин водитель тир.
Кьасумхуьруьн 1-нумрадин юкьван школадин цлал штурмовой дестедин аскер, алай йисан 9-июндиз ДНР-да телеф хьайи Дагълар Лукьманован шикил алай кьул алкIурна.
Наводчик яз СВО-да къуллугъ авур, 42 йисан яшда аваз игитвилелди телеф хьайи Райфудин Нуралиеваз мемориальный кьулар ада кIелай Птидхуьруьн, Уллу-Гъетягърин юкьван школайрин цларал алкIурна.
Райондин кьил С.Темирханова, жавабдар ксари, рагьметдиз фейибурун багърийри ва школьникри мемориальный кьуларал цуьквер эцигна.
Хазран Кьасумов
