Ахцегьрин 2-нумрадин юкьван школа куьтягьайдалай кьулухъ Москвадин Жукован тIварцIихъ галай высший общевойсковой училищедик экечIай Эрзиман Асаев чи рикIел боксдай республикадин акъажунра иштиракай хъсан боксёр хьиз алама. 2019-йисуз военный училище агалкьунралди акьалтIарна, РФ-дин армиядин жергейра къуллугъиз хьайи жегьил офицерди Украинадин кьиле тухузвай СВО-дани вич кар алакьдай викIегь командир хьиз малумарна.
РФ-дин Президент В.Путинан Указдалди 2022-йисан 14-ноябрдиз мотострелковый ротадин командир, старший лейтенант Асаев Эрзиман Кавказовичаз «Жуьрэтлувиляй» орден гана. Женгинин и чIехи шабагьдиз викIегь ахцегьви, чандилай гъил къачуна, душмандин миномётрин ягъуник акатнавай аскерар къутармишунай лайихлу хьана. И женгина залан хер хьайи ам Санкт-Петербургда кIвачел ахкьалдарна, са кьадар ял ягъун патал хайи ватандиз хкведай рухсат гана. Алай вахтунда ам вичин юлдашрихъ галаз миллетбазриз акси женгиник эхкечIнава. Чи мурад ам гъалибвал гваз сагъ-саламатдиз хайи ватандиз хтун я.
* * *
Украинада дяведин махсус серенжемдив эгечIайла, прапорщик Сулейманов Риад Энвербеговича Амурдин военный округда къуллугъзавай. 2022-йисан 23-сентябрдилай ам СВО-да ракетный дивизиондин отделенидин командир я. Ватанпересвилин буржи намуслувилелди тамамарунай ва душмандихъ галаз женгинин кьетIен игитвилин чешнейрай викIегь дагъви РФ-дин Президент Владимир Путинан Указдалди «Жуьрэтлувиляй» ордендиз лайихлу хьана. «Чна Риадал дамахзава. Ам сагъ-саламатдиз ва хурудал къизилдин гъед алаз хтун патал дуьа ийизва», – лугьузва ам чидайбуру.
* * *
Ахцегь райондин Хуьруьгрин хуьряй хушуналди фена СВО-да иштиракзавай Якъубов Икрам Тажидиновичаз душман кукIварай Пак Георгийдин «Георгийдин IV дережадин хаш» орден ганва.
Дашдемир Шерифалиев
