Донбассдин шегьерарни хуьрер миллетчийрикайни фашист­ри­кай азад авун патал кьиле тухузвай дяведин махсус серенжемда агъзурралди дагъустанвий­ри иштиракзава. Абуру чпин вилик­ эцигнавай мажбурнамая­р викIегьдаказ, намуслувилелди, бя­зи вахтара чандилайни гъил къачуна, тамамарзава. Махсус се­ренжемда Хасавюрт райондин ЦIийи Къурушрин хуьряй саки вад виш касди иш­тиракзава. Гьайиф хьи, вад кас женгера телеф хьана. Аллагьди рагьмет гурай чпиз. 

Серенжемдин иштиракчийрикай сад Вердиханов Дурахан Пирбудагъович я. Ам 1969-йисуз Къурушрин хуьре тIвар-ван авай, вирида гьуьрметзавай Вердихановрин хизанда дидедиз хьана.

Армиядин жергейра къул­лугъ­на­ хтай Дурахана 22 йисуз МВД-дин органра къуллугъна. Пенсия­диз ­экъе­­чIайдалай кьулухъ ада Кас­пийск­ шегьерда авай гьуьлерин пия­да полкуна вичин къуллугъ давамарна.

Украинада дяведин махсус­ серенжем башламишай сифте йикъалай­ ада ватандин итижар дири­баш­вилел­ди­ хуьзва. Вилик эцигнавай тап­шу­ру­гъар намуслудаказ тамамарунай кье­гьал аскер «Дирибашвиляй» 2 ордендиз, Жукован ва маса медалриз лайихлу хьанва. Гатун вахтунда муьгьлетдиз хтай Дурахан Пирбудагъовича вичин дус­тарихъ галаз санал пул кIватIна, серенжемда чарасуз тир кьве квадроцикл  къачуна­, вичи къуллугъзавай чкадиз рахкурна.

Баркалла ихьтин игит рухвайриз! Чун инанмиш я хьи, абур гъалибвал гваз хкведа.

Гьажи  Къазиев