И йикъара Дагъустандин Халкьдин Собранидин Председатель Заур Аскендерова РКБ-дин куникди хирер хьайибурун (ожоговый) центрадиз вичин хсуси такьатрихъ маса къачунвай махсус 6 чарпай гана. Мярекатда Дагъустандин вице-премьер Абдурагьман Магьмудова ва здравоохраненидин министр Татьяна Беляевади иштиракна.
Республикадин парламентдин спикерди мергьяматлувилин къанунралди кьилиз акъуднавай серенжем мукьвара Махачкъалада кьиле фейи мусибатдин дуьшуьшдихъ галаз алакъалу я. А чIавуз куникди гзафбуруз хасаратвилер гана. Республикадин центрадихъ техникадин рекьяй авай кимивилерни дуьздал акъатна.
Мусибатдин дуьшуьш арадал атай четин декьикьайра духтуррин пешекарвал къейд авунихъ галаз сад хьиз, З.Аскендерова республикадин вири агьалияр чпелай алакьдай куьмекар гуз гьазур тирдини рикIел хкана.
— Чаз лазим тадаракар–чарпаяр жагъана. ГьикI хьи, абурун кьитвал ава. Чи республикадиз абур чарасуз лазим тирди фикирда кьуналди, чна кIвалахдин рекьяй юлдашрихъ галаз санал абур акъудзавай кархана чирна, маса къачун патал тади гьалда серенжемар кьабулна, — алава хъувуна ада.
Куникди хирер хьайибурун центрадин регьбер Мегьамед Агьмедова мугьманар медидарадин дарамат авай гьалдихъ галаз танишарна. ЦIийиз агакьнавай чарпаяр вуч паталди лазим ятIа, гъавурда туна.
— И жуьредин тадаракар чаз куникди хирер хьайибуруз сифтегьан 5-7 юкъуз куьмек гун патал лазим я. Им ахьтин ксар патал виридалайни агъур вахт я. Ахпа чавай абуруз адетдин чарпайдал чка гуз жеда. Махсус кроватар операцияр ийидайлани лазим я, — къейдна ада.
РКБ-дин кьилин духтурдин заместитель Себибулла Абдуллаева вичин нубатдай яз, Махачкъалада хъиткьинун арадал атунин дуьшуьшда хасаратвилер хьайибур патал куьмек гунай республикадин парламентдин депутатризни сагърай лагьана. Кьилди къачуртIа, абуру реанимациядин отделение патал кондиционерар маса къачунай.
Эхирдай Заур Аскендерова центрадин дараматда ремонтдин кIвалахар кьиле тухун, гьакIни аниз кондиционерар маса къачун пландик кутунвайди раижна. И месэлаяр депутатрихъ галаз санал гьялда.
Мадни ада пешекарвал къалурунай РКБ-дин духтурриз, кьетIен гьалар ва маса дуьшуьшар арадал атай чIавуз гьамиша вилик жергейра авай РД-дин здравоохраненидин министр Татьяна Беляевадиз сагърай лагьана.
Чи мухбир
