Велосипед вахкана
Алатай вацран эхирра Избербашдин полициядин дежурный частуниз 39 йисан яшда авай чкадин агьалиди вичин кIвалин патав гвай велосипед (ам 9 йисан яшда авай хцинди я) малум тушир итимди ачухдаказ чуьнуьхна лагьана арза авуна. Идакай РД-дин МВД-дин пресс-къуллугъди хабар гана.
Полицейскийри чIуру ният авай кас тайинарна ва отделдиз хкана. Ам 49 йисан яшда авай избербашви тир. Тахсиркарди вичи авур кар хиве кьуна. Ада ихтилат авурвал, велосипед гвай гада адаз нянрихъ акуна. Ада аял велосипеддивай къерех жедай макъам вилив хуьз хьана. Гуьгъуьнлай ада вичин ният кьилиз акъудна. Велосипед чуьнуьхзавайди акур аялди адан гуьгъуьниз чукурнатIани, ам агакьнач. Амма аял кефияр чIуру яз яргъалди амукьнач: полицейскийри пис ният авай итим гьасятда жагъурна ва аялдив велосипед вахкана.
Кьунвай итимди ихтилат авурвал, велосипед ада гележегда кIвалахал фин патал чуьнуьхна.
И делилдай суд-дуван авун патал материал кIватIнава.
ЧукIулдив яна
Алай йисан 2-сентябрдиз Къули райондин 55 йисан яшда авай, чкадин азарханада азарлу яз къатканвай агьалиди медицинадин идарада кIвалахзавай 55 йисан яшда авай дишегьли жибиндин чукIулдив яна.
Хасаратвал хьайи дишегьлидиз чкадал медицинадин рекьяй куьмек гана. Шак фенвайди полицейскийри отделдиз хканва. Тахсиркарвал кьиле фейи чкадилай чукIул вахчунва.
И делилдай суд-дуван авун патал материал кIватIнава. Силисдин кIвалах давам жезва.
«Лезги газет»
