Донбассдин шегьерар, хуьрер, агьалияр Украинадин миллетчийрикай, фашистрикай азадун патал кьиле тухузвай дяведин махсус серенжемда вишералди чи ватанэгьлийрини иштиракзава, гьейранвалдай игитвилерни къалурзава. Россиядин Игит Энвер Набиев, Белиж поселокдай тир кьуд стха офицерар Абдулмурад, Агъарагьим, Ямудин, Сиражудин Алиметовар, мегьарамдхуьруьнви Исмаил Мегьамедов гьахьтинбурукай я.
Гьикьван гьайиф къведай кар ятIани, телефвилерни жезва – дяве я. Ватандин вилик пак буржи, командиррин тапшуругъар тамамардайла, абуру уьтквемвал, викIегьвал, мягькемвал къалуриз, душмандин вилик пад кьазва. Миллетбазар кьулухъди катдай чкадал гъизва.
2022-йисан мартдиз ери-бине СтIал Сулейманан райондай тир лейтенант Муслимов Азим, вичин гъилик квай аскерар, юлдашар душмандин гуьллейрикай къутармишдайла, телеф хьана. Бедбахт кьисметдин викIегь рухвайриз рагьмет хьурай.
Мегьарамдхуьруьн райондин хуьрерай махсус серенжемда цIудралди кьегьалри иштиракзава. Телеф хьайибурун диде-бубайриз ва багърийриз чна, дериндай хажалат чIугунивди, башсагълугъвал гузва. Ватандин азадвал, аслу туширвал патал чанар къурбанд авур жегьилар игитар я. Чна къе абур рикIел хкин.
Билбил-Къазмайрилай тир Гьамидов Тагьир Гьаснудиновичан 23 йисни хьанвачир. Дяведин махсус серенжемдиз аватай жегьилди (мехъерардай муьгьлетни амукьнач) зайифвал къалурнач. Запорожьедин областдин Токмак шегьерда командиррин тапшуругъ тамамардайла, Тагьиран уьмуьр душмандин гуьлледи кьатIна. Ам хайи хуьре кучукнава.
Тагьирхуьруьн-Къазмайрилай тир майор, махсус дестедин (спецназ) командир Руслан Жамалдинович Примовахъ мадни чIехи дережайрихъ тухудай алакьунар авай. Ада вичин командирвилин везифаяр чешнелудаказ кьилиз акъудзавай. Краповый беретдин иесидиз командиррин ва аскеррин арада еке гьуьрмет авай. Украинадин миллетбазри зулумдик кутунвай агьалийриз азадвал багъишунин макьсаддалди Примова вичин дестени галаз, хаталу чкайриз физ, неонацистар тергзавай, хуьрер, шегьерар азад хъийизвай. Запорожьедин областда душмандин гуьллейрин харцик акатнавай юлдашар къутармишдайла, ам телеф хьана. Авай са хва тир. 13-июлдиз хайи хуьре кучукна.
Примован хуьруьнви, сержант Ибилкьасумов Рамидин Жаруллагьовични, Украинадин миллетбазрихъ галаз женг чIугвадайла, телеф хьана. Инженервилинни саперрин кьилдин ротадин взводдин командирди вичин юлдашрихъ галаз лап четин везифаяр кьилиз акъудзавай. Душман къвезвай рекьерик минаяр кутазвай, чи аскерар виликди физвай чкаяр минайрикай михьзавай. Нубатдин сеферда бахтуни гъанач. Сержант хайи хуьре фаракъатнава.
Жергедин аскер, дяведин махсус серенжемда сифте йикъалай иштиракзавай Хъартас-Къазмайрилай тир Мукаилов Тигран Асанбалаевич гъвечIи чIавалай рикI ватанпересвилив ацIанвай кьегьал тир. Ватандин патай эвер атайлани, ам кьулухъ акъвазнач. КIвале хизан, кьве велед туна фена. Гила абурун гьакъиндай государстводи къайгъу чIугвазва.
Танкарин взводдин командир тир азадугъливи Агьмедханов Эдуард Исмидиновичан алакьунрал, ада душмандин тупар, техника, танкар тергзавай тегьер командирри масадбуруз чешне къалурзавай. Нубатдин сефердани ам командирдин тапшуругъ тирвал кьилиз акъудна, хкведа лагьана, фена. Гьайиф хьи, душмандин яракьди адаз инсафнач.
Чи игитрин ва Ватандин азадвал патал чанар къурбанд авур викIегь маса рухвайрин игитвал, кьегьалвал даимди я. Абур гьамиша чи рикIера ва къвезвай несилриз чешне яз амукьда. Абурун руьгьдиз бахшнавай шиир 11-чина ганва.
Нариман Ибрагьимов
