Махачкъалада 16-сентябрдиз республикадин дережада аваз хуьруьн майишатдин мекера кьиле фида. Ам Дагъустандин меркездин администрациядихъ галаз санал РД-дин хуьруьн майишатдин ва недай суьрсетдин министерстводи тешкилзава.
Мекера патал Пушкинан куьчеда махсус майдан чара ийидайвал я.
РД-дин хуьруьн майишатдин ва недай суьрсетдин министерстводин пресс-къуллугъди хабар гайивал, мекерада Дагъустандин жуьреба-жуьре районрай тир хуьруьн майишатдин суьрсет гьасилзавайбуру ва недай-хъвадай затIаринни гьялдай промышленностдин карханайрин векилри иштиракда. Чкадин агьалийриз ва мугьманриз тIем акакьдай къиметрай хъсан еридин михьи суьрсет маса къачудай мумкинвал ава. Мекерадин кьетIенвилерикай сад ам я хьи, муьштерийривай, арада арачи авачиз, чпиз кIани суьрсет хкягъиз жеда.
Къейд ийин хьи, мекераяр кьиле тухуни республикадин хуьруьн майишат вилик финиз таъсирзава. Идалайни гъейри, суьрсет гьасилзавайбуруз чпин «зегьметдин бегьер» маса гудай майданни арадал къвезва.
Агьмед Магьмудов
