Проект кьилиз акъудунин нетижада республикада къушарин якIухъ авай игьтияждин 7 процент таъминариз жеда
Мукьвара РД-дин хуьруьн майишатдин ва недай суьрсетдин министр Мухтарбий Аджеков Буйнакскдин райондин Нижнее Казанище хуьруьн мулкарал эцигзавай къушарин як гьялдай заводдиз талукь проект кьилиз акъудзавай гьалдихъ галаз таниш хьана.
Министерстводин пресс-къуллугъдин делилралди, «Буйнакский птицепром» ООО-дихъ, санлай къачурла, 500 агъзурдав агакьна къушар гьакьдай махсус дараматар эцигдай фикир ава. И макьсадриз карханади 1 миллиард манат пул чара ийидайвал я. Проект кьилиз акъудунин нетижада йисан къене 2 миллионни 500 агъзур къуш кутадай ва 7 агъзурдав агакьна къушарин як гьялдай мумкинвал жеда.
Исятда проект кьилиз акъудзавай майдандал эцигунрин кIвалахар худда ава. 2024-йисан гатфарихъай къушар хуьдай 18 дарамат ачухдайвал я.
«Чун и проектдиз вири патарихъай алакьдай куьмекар гуз гьазур я. Дагъустандин Кьили чи вилик АПК-дин хилез инвестицияр желб авунин месэла эцигнава. Сифте нубатда – республика суьрсетдин асул жуьрейралди бес кьадар таъмин жедайвал. Ихтилат физвай проект кьилиз акъудунин нетижада регионда агьалийриз къушарин якIухъ авай игьтияждин 7 процент таъминарда. Идалайни гъейри, кIвалахдай алава 100 чка арадал гъидай мумкинвални жеда», — лагьана Мухтарбий Аджекова.
Агьмед Магьмудов
